اسلام آباد (رافعہ زاہد سے ) ہمارا پرامن احتجاج ہوگا اورجلد پورے پاکستان میں ہوگا۔۔۔آئی پی پیز سے فالٹی معاہدے کیے گئے، امپورٹڈ فیول پر پلانٹس لگے۔۔پی ٹی آئی کے سیکریٹری جنرل عمر ایوب خان کا ملک میں نئے انتخابات کا مطالبہ ۔جیو نیوز کے پروگرام کیپیٹل ٹاک میں گفتگو کرتے ہوئے عمر ایوب نے کہا کہ ہمارا پرامن احتجاج ہوگا اور پورے پاکستان میں ہوگا، ہمارے لیڈر کو جیل میں ڈالا گیا، ہمیں دربدر کیا گیا، کیا ہوا ہم مزید اکثریت میں آگئے۔ عمر ایوب سے جب بھوک ہڑتال پر تنقید سے متعلق سوال کیا گیا تو انہوں نے بیان دیا کہ بھوک ہڑتال ہم کررہے ہیں اس سے کسی کو کیا تکلیف ہے، ہم چار پانچ گھنٹے کیمپ میں بیٹھتے ہیں کسی کو تکلیف ہے تو آکر ہمارے ساتھ بیٹھ جائے۔انہوں نے پروگرام میں گفتگو کرتے ہوئے کہا تحریک انصاف پر پابندی کا کوئی خطرہ نہیں، کیونکہ سپریم کورٹ نے کہا ہے کہ تحریک انصاف ایک سیاسی پارٹی تھی، ہے اور رہے گی۔انہوں نے مزید کہا کہ سپریم کورٹ کے فیصلوں پر عمل نہیں ہوگا تو سرمایہ کاری کیوں آئے گی، آئی پی پیز سے فالٹی معاہدے کیے گئے، امپورٹڈ فیول پر پلانٹس لگے۔پی ٹی آئی کے سیکریٹری جنرل عمر ایوب خان نے ملک میں نئے انتخابات کا مطالبہ کر دیا۔ان کا کہنا تھا کہ ہمارا ہدف ایک ہے کہ آزادانہ اور شفاف الیکشن ہوں، ضروری نہیں کہ نئے الیکشن کےلیے اسمبلی تحلیل کی جائے، کب کیا اور کیسے کرنا ہے یہ کارڈ ہم اپنے پاس رکھیں گے، ہمارے اتحادیوں کی اپنی اپنی سوچ ہے۔پروگرام کے میزبان نے جب عطاء تارڑ کے گزشتہ روز رؤف حسن سے متعلق الزامات کا ذکر کیا تو انہوں نے بیان دیا اور تردید کی کہ رؤف حسن کی بطور انفارمیشن سیکریٹری تنخواہ لینے والی بات جھوٹ ہے، عطا تارڑ کے رؤف حسن پر الزامات میں کوئی صداقت نہیں، یہاں تو ہم پر موٹرسائیکل اور ایکسرے مشین چوری کے بھی الزام لگائے گئے۔
