اتر پردیش کے شہر جھانسی میں ایک نوبیاہتا دلہن کی پراسرار موت نے پورے خاندان کو ہلا کر رکھ دیا۔ مسکان کے ہاتھوں پر لگی مہندی کا رنگ ابھی پھیکا بھی نہیں پڑا تھا کہ وہ ہوٹل کے کمرے کے دروازے پر اچانک زمین پر گر کر دم توڑ گئی۔
چار ماہ قبل مسکان کے والد نے بیٹی کو دھوم دھام سے رخصت کیا تھا، تاہم اب اس کی اچانک موت نے اہلخانہ کو غم سے نڈھال کردیا ہے۔
ہوٹل کی سامنے آنے والی سی سی ٹی وی فوٹیج میں مسکان کو اپنے شوہر نلیش کے ساتھ ہوٹل پہنچتے دیکھا جاسکتا ہے۔ فوٹیج کے مطابق ہوٹل کے کمرے کے دروازے پر پہنچنے کے چند ہی سیکنڈ بعد مسکان اچانک گر جاتی ہے۔
مسکان کے والد نے الزام عائد کیا ہے کہ نلیش یہ کہہ کر بیٹی کو ساتھ لے گیا تھا کہ اسے اس کی خالہ کے گھر لے کر جارہا ہے، لیکن وہ اسے ہوٹل لے گیا۔
اہلخانہ نے مسکان کی موت پر شکوک کا اظہار کرتے ہوئے قتل کا شبہ ظاہر کیا ہے اور واقعے کی مکمل تحقیقات کے ساتھ ذمہ داروں کے خلاف کارروائی کا مطالبہ کیا ہے۔
