سلمان خان کے گھر میں پراسرار واقعات، روشنیاں خود بخود بجھنے لگتیں، الماریاں کھل جاتیں، اداکار نے بھوت کی موجودگی کا حیران کن قصہ سنا دیا
بالی ووڈ سپر اسٹار سلمان خان نے اپنے گھر میں پیش آنے والے پراسرار واقعات کا انکشاف کرکے سب کو حیران کر دیا۔ اداکار کے مطابق ممبئی کے گلیکسی اپارٹمنٹس میں واقع ان کے بیڈروم میں انہیں ہمیشہ کسی ان دیکھی مخلوق کی موجودگی کا احساس ہوتا تھا، جہاں لائٹس خود بخود جھلملا اٹھتیں، الماریاں کھل جاتیں اور میوزک سسٹم خود ہی چلنے لگتا تھا۔
سلمان خان نے یہ انکشاف کرن جوہر کے معروف شو کافی ود کرن سیزن 9 کی افتتاحی قسط میں گفتگو کے دوران کیا۔ کرن جوہر نے 1998 میں فلم ’کچھ کچھ ہوتا ہے‘ کے حوالے سے پرانی یادیں تازہ کرتے ہوئے بتایا کہ وہ ایک مرتبہ سلمان خان کے گھر گئے تھے، جہاں ان کے والد سلیم خان، والدہ سلمیٰ خان اور بھائی ارباز و سہیل بھی رہتے تھے۔ وہ یہ دیکھ کر حیران رہ گئے کہ اتنے بڑے اسٹار کا کمرہ انتہائی چھوٹا تھا، جس میں صرف ایک الماری اور بستر موجود تھا۔
سلمان خان نے بتایا کہ وہ اس کمرے میں کبھی اکیلے نہیں سوتے تھے کیونکہ انہیں وہاں کسی ان دیکھی موجودگی کا احساس ہوتا تھا۔ ان کے بقول جب بھی وہ کمرے سے باہر نکلتے تو روشنیاں جھلملا اٹھتیں، الماریاں خود بخود کھل جاتیں اور میوزک سسٹم بھی خود ہی چلنے لگتا تھا۔ حتیٰ کہ باتھ روم میں موجود ہوتے ہوئے بھی انہیں باہر کسی کی موجودگی محسوس ہوتی تھی۔
کرن جوہر نے پوچھا کہ کیا وہ اس کمرے کو بھوتوں والا سمجھتے تھے؟ جس پر سلمان خان نے وضاحت کی کہ وہ اسے بھوتوں کا معاملہ نہیں سمجھتے تھے، لیکن وہاں کسی کی موجودگی ضرور محسوس ہوتی تھی۔
سلمان نے مزید بتایا کہ وہ کمرے میں موسیقی چلاتے اور پھر باہر نکل جاتے تھے، جبکہ باہر بلیئرڈ کھیلتے ہوئے بھی انہیں کمرے کے اندر کسی کی موجودگی کا احساس ہوتا تھا۔
دوسری جانب فلمی محاذ پر سلمان خان جلد ہدایت کار اپوروا لاکھیا کی فلم ’ماترو بھومی: مے وار ریسٹ اِن پیس‘ میں نظر آئیں گے۔
