سینیٹ الیکشن ویڈیو سکینڈل میں ملوث ارکان اسمبلی فہیم خان اورجمیل احمد کے حوالے سے اہم خبر

اسلام آباد (مانیٹرنگ ڈیسک) سینیٹ الیکشن کے دوران بھاری رقم وصول کرنےکی ویڈیو کے معاملے پر الیکشن کمیشن آف پاکستان نے تحریک انصاف کے ارکان اسمبلی جمیل احمد اورفہیم خان کو طلب کر لیاہے۔الیکشن کمیشن نے یوسف رضا گیلانی کے سینیٹ الیکشن کو کالعدم قراردینے سے متعلق درخواست میں علی حیدرگیلانی کی مبینہ دھاندلی کی ویڈیو میں موجود ایم این ایزجمیل احمد اور فہیم خان کو آئندہ سماعت پر ذاتی حیثیت میں طلب کرلیا۔یوسف رضا گیلانی کے سینیٹ الیکشن کو کالعدم قرار دینے سے متعلق الیکشن کمیشن میں جسٹس ریٹائرڈ ارشاد قیصر کی سربراہی میں 3 رکنی بنچ نےسماعت کی۔ پی ٹی آئی کے ایم این ایز جمیل احمد اور فہیم خان نے جواب الیکشن کمیشن میں جمع کرادیا۔علی حیدر گیلانی کے وکیل نےکہا کہ الیکشن نتائج کے 60 دن کے بعد الیکشن کو کالعدم قرار نہیں دیا جاسکتا، درخواست گزاروں نے ایک نہ ختم ہونے والا سلسلہ شروع کر رکھا ہے۔ جسٹس ارشاد قیصر نے کہا کہ یوسف رضا گیلانی کے خلاف کرمنل کارروائی کی درخواست کی گئی ہے، جواب پر فریقین کے دستخط کیوں نہیں ہیں ؟ آئندہ سماعت پر کیپٹن جمیل اور فہیم خان کو جواب کی تصدیق کے لیے بلالیتے ہیں، جمیل احمد اور فہیم خان ابھی تک الیکشن کمیشن کے سامنے پیش نہیں ہوئے، یہ کیس کافی وقت سے زیر التوا ہے، اس کا فیصلہ ہوجانا چاہیے۔