راولپنڈی ( نیوز ڈیسک ) پاکستان تحریک انصاف نے رکن قومی اسمبلی شیر افضل مروت کو شوکاز نوٹس جاری کرنے کا فیصلہ کرلیا۔ اڈیالہ جیل کے باہر میڈیا سے گفتگو میں سیکریٹری جنرل پی ٹی آئی عمر ایوب نے کہا کہ شیر افضل مروت کو بانی چیئرمین پی ٹی آئی عمران خان نے بہت عزت و احترام دیا، شیر افضل مروت کو بارہا پارٹی پالیسی کی خلاف ورزی نہ کرنے کی ہدایات دی گئیں لیکن اب عمران خان نے حکم جاری دیا ہے کہ شیر افضل مروت کو کور کمیٹی اور پولیٹیکل کمیٹی سے الگ کیا جائے۔
عمران خان نے حکم دیا ہے، شیر افضل مروت کو کور کمیٹی ، سیاسی کمیٹی سے علیحدہ اور شوکاز نوٹس جاری کیا جائے، سیاسی کمیٹی فیصلہ کرے ان کیخلاف کیا ایکشن لیا جائے، عمر ایوب۔۔۔!!!@Muqabil_With_RK pic.twitter.com/6aMORl2Grw
— Mad e Muqabil (@Muqabil_With_RK) May 9, 2024
ان کا کہنا ہے کہ عمران خان نے کہا ہے پولیٹیکل کمیٹی شیر افضل مروت کے خلاف ڈسپلنری ایکشن لے، بانی پی ٹی آئی نے کہا ہے شیر افضل مروت کو شو کاز نوٹس جاری کیا جائے، عمران خان نے کہا ہے سعودی حکومت کے ساتھ ذاتی تعلقات کو شیر افضل مروت نے زک پہنچایا ہے، بانی پی ٹی آئی کے سعودی ولی عہد محمد بن سلمان کے ساتھ نہایت اچھے تعلقات ہیں، شیر افضل مروت نے سعودی حکومت کے ساتھ تعلقات کو خراب کرنے کی کوشش کی ہے۔
بتایا جارہا ہے کہ پی ٹی آئی نے چیئرمین پبلک اکاؤنٹس کمیٹی کے لیے پہلے رکن قومی اسمبلی شیر افضل مروت کے نام کا اعلان کیا تھا تاہم شیر افضل مروت کو پبلک اکاؤنٹس کمیٹی کا چئیرمین نہ بنانے کے پیچھے ان کا سعودی عرب سے متعلق بیان وجہ بنی ، تحریک انصاف کے قائد عمران خان سعودی عرب سے تعلقات میں کسی قسم کی خرابی نہیں چاہتے اور اس صورتحال میں شیر افضل مروت کی تقرری سے منفی پیغام جا سکتا تھا، اس لیے پاکستان تحریک انصاف نے چیئرمین پبلک اکاؤنٹس کمیٹی کے عہدے کیلئے نئے نام کا باقاعدہ اعلان کیا، اس ھوالے سے سیکریٹری اطلاعات پی ٹی آئی رؤف حسن نے بتایا کہ پی ٹی آئی کی جانب سے چیئرمین پی اے سی کا نام فائنل ہوچکا ہے، اس عہدے کے لیے ہمارے اُمیدوار شیخ وقاص اکرم ہوں گے، پارٹی قائد عمران خان نے ان کے نام کی منظوری دی ہے۔
