نیشنل ایمرجنسی آپریشن سینٹر کا سمندری طوفان کاالرٹ جاری

کراچی (نیوز ڈیسک )نیشنل ایمرجنسی آپریشن سینٹرکی جانب سے سمندری طوفان کاالرٹ جاری کر دیا گیا۔
این ای او سی نے سندھ کےساحلی علاقوں میں طوفان اورشدید بارشوں کی پیش گوئی کر دی۔ اعلامیہ میں کہا گیا ہے کہ بھارت سے پاکستان میں داخل سسٹم کے زیراثر طوفانی بارشوں کاامکان ہے۔
این ای او سی کے مطابق تھرپارکر،بدین،ٹھٹھہ،سجاول،حیدرآباد،ٹنڈومحمدخان ، میرپورخاص، سانگھڑ،جامشورو، دادو اورشہیدبینظیر آباد میں طوفانی بارشیں متوقع ہیں۔ موسلادھاربارش سےبلوچستان کےندی نالوں میں سیلابی صورتحال کاامکان ہے۔
نیشنل ڈیزاسٹر منیجمنٹ (این ڈی ایم اے)کے مطابق عمرکوٹ، مٹیاری اورٹنڈواللہ یارمیں بھی طوفانی بارشوں کا امکان ہے، طوفان کے نتیجے میں شہروں میں سیلابی صورتحال کاخدشہ ہے۔
این ڈی ایم اے کے مطابق کراچی سےتقریباً 277کلومیٹرجنوب مشرق میں طاقت وارسسٹم برقرارہے، جبکہ مغرب اورجنوب مغرب کی طرف بڑھنے سےطوفان میں تبدیلی کا امکان ہے۔
دوسری جانب وزیراعلیٰ سندھ مراد علی شاہ نےصوبے بھر میں طوفانی بارشوں اور طوفان کے الرٹ کے پیش نظر تمام اداروں کو تیار رہنے کی ہدایت کر دی۔
مراد علی شاہ نے کہا کہ طوفان کی پیشگوئی کے مطابق صوبے کے بیشتر اضلاع میں شدید بارشوں کا امکان ہے، محکمہ موسمیات اور صوبائی ڈیزاسٹر مینجمنٹ اتھارٹی (پی ڈی ایم اے )کو الرٹ رہنے ہدایات جاری کی گئیں ہیں۔
وزیراعلیٰ نے بلدیاتی اداروں کو مزید متحرک رہنےاور ساتھ ہی صوبےکے تمام اسپتالوں کو اپنےانتظامات بہترکرنےکے احکامات جاری کیے ہیں مراد علی شاہ کا کہنا تھا کہ طوفانی بارشوں کے دوران ہسپتالوں کا عملہ اپنی حاضری یقینی بنائے۔
علاوہ ازیں کمشنر کراچی نے طوفان کے الرٹ کے پیش نظر سمندر میں نہانے پر پابندی عائد کر دی ہے۔ کمشنر کراچی کی جانب سے جاری نوٹیفکیشن کے مطابق سمندر میں نہانے پر پابندی ہے اور دفعہ 144 کی خلاف ورزی کرنے والوں کے خلاف قانون کے مطابق کارروائی عمل میں لائی جائے گی۔
اس کے علاوہ کمشنر کراچی نے موسم کی بگڑتی صورتحال کے باعث شہریوں سے اپیل کی ہے کہ وہ اس دوران سمندر کی طرف جانے سے گریز کریں۔