پی ٹی آئی نے گلگت بلتستان میں ایک اور نشست پر کامیابی حاصل کر لی

پاکستان تحریک انصاف نے گلگت بلتستان میں ایک اور نشست پر کامیابی حاصل کر لی ہے جس کے بعد اس کی 11 نشستیں ہو گئی ہیں جبکہ 6 آزاد امیدوار بھی پی ٹی آئی میں شمولیت کا اعلان کر چکے ہیں۔۔

پی ٹی آئی کے امیدوار سید سہیل عباس نے حلقہ جی بی ایل اے 3 سے کامیابی حاصل کی ہے، اس نشست پر پی ٹی آئی کے امیدوار سید جعفر شاہ کی وفات کی وجہ سے پولنگ ملتوی کر دی گئی تھی۔

سید جعفر شاہ پی ٹی آئی اے مقامی صدر تھے اور وزیراعلیٰ کے سب سے مضبوط امیدوار سمجھے جاتے تھے، ان کا 11 اکتوبر کو کورونا وائرس کے باعث انتقال ہو گیا تھا۔

غیرسرکاری نتائج کے مطابق سہیل عباس نے 5 ہزار 790 ووٹ حاصل کیے جبکہ ان کے مدمقابل آزاد امیدوار ڈاکٹر محمد اقبال 3 ہزار 211 ووٹ حاصل کر سکے۔

اس نشست سے فتح کے بعد اور 6 آزاد امیدواروں کی شمولیت سے پی ٹی آئی کو گلگت بلتستان اسمبلی میں دو تہائی اکثریت حاصل ہو گئی ہے، ان کی 17 نشستیں ہو گئی ہیں۔

گلگت بلتستان کے نومنتخب اراکین 25 نومبر کو حلف اٹھائیں گے۔

گلگت بلتستان کی تیسری قانون ساز اسمبلی کی 24 جنرل نشستوں کے لیے 4 خواتین سمیت 330 اُمیدوار انتخابات میں حصہ لیا تھا جس میں ایک نشست پر انتخاب ملتوی ہوا تھا۔

ابتدائی نتائج کے مطابق 23 حلقوں میں پاکستان تحریک انصاف نے 10 نشستوں پر کامیابی حاصل کی تھی جبکہ 7 آزاد اُمیدوار کامیاب ہوئے۔

پاکستان پیپلز پارٹی نے 3 ، پاکستان مسلم لیگ (ن) نے 2 جبکہ متحدہ وحدت المسلمین نے ایک نشست پر کامیابی حاصل کی تھی۔ اپوزیشن نے ان انتخابات میں دھاندلی کے الزامات عائد کیے تھے۔