امریکی صدر ڈونلڈ ٹرمپ نے صدر الیکٹ جوبائیڈن کی کامیابی کو تسلیم کرتے ہوئے متعلقہ اداروں کو انتقال اقتدار کا عمل شروع کرنے کی ہدایات جاری کر دی ہیں۔
امریکہ میں حکومت کے انتظامی معاملات کے نگران ادارے جنرل سروسز ایڈمنسٹریشن (جی ایس اے) کی جانب سے صدر الیکٹ جوبائیڈن کو ایک خط تحریر کیا گیا ہے جس میں صدر ٹرمپ کی جانب سے قانون اور شواہد کی بنیاد پر ان کی فتح کو تسلیم کرنے کا اقرار کیا گیا ہے۔
جی ایس اے کی سربراہ ایملی مرفی نے خط میں تحریر کیا ہے کہ صدر ٹرمپ نے جوبائیڈن کی فتح کو کسی دباؤ کے زیراثر تسلیم نہیں کیا۔
انتخابات کے نتائج پر نظر رکھنے والے ماہرین کا کہنا ہے کہ بظاہر صدر ٹرمپ نے اہم ریاستوں میں ووٹنگ کو چیلنج کرنے میں ناکامی کے بعد ڈیموکریٹ امیدوار کی فتح کو تسلیم کیا ہے۔
صدر ٹرمپ کی جانب سے چیلنج کی گئی ریاست مشی گن کے حکام نے گزشتہ روز جوبائیڈن کی فتح کا دوبارہ اعلان کیا تھا۔
صدر ٹرمپ ریاست مشی گن میں جوبائیڈن کی فتح کے پیچھے دھاندلی کی نشاندہی کی تھی۔
صدر نے اپنے ٹویٹر پیغام میں لکھا کہ انہوں نے ملکی مفاد کی خاطر انتظامی امور کے نگران ادارے جی ایس اے کو ہدایات کی ہیں کہ وہ مکمل قواعد و ضوابط کی روشنی میں انتقال کے امور کا کام شروع کریں۔
اپنے پیغام میں انہوں نے لکھا کہ انہوں نے اپنی انتظامی ٹیم کو بھی یہی ہدایات کی ہیں۔
صدر الیکٹ کی فتح تسلیم کرنے کے ساتھ ہی انہوں نے لکھا کہ وہ مخالف امیدوار کے خلاف اپنی قانونی جنگ جاری رکھیں گے۔
یاد رہے رواں سال صدارتی انتخابات میں کامیابی حاصل کرنے والے صدر جوبائیڈن 20 جنوری کو حلف لیں گے جس کے لیے انہوں نے اپنی انتظامی ٹیم میں بھرتیوں کا کام شروع کر دیا ہے۔
