اسلام آباد (مانیٹرنگ ڈیسک ) آسٹریلیا کے سابق اسپنر بریڈ ہوگ نے ورلڈکپ ٹی ٹوئنٹی کے بہترین کھلاڑیوں پر مشتمل اپنی ٹیم کی قیادت کے لیے بابراعظم کا انتخاب کیا ہے۔ بریڈ ہوگ نے حال ہی میں منعقد ہونے والے ورلڈکپ ٹی ٹوئنٹی میں بہترین کارکردگی کے حامل کھلاڑیوں پر مشتمل اپنی ٹیم تشکیل دی ہے جس میں انہوں نے پاکستان سے دو کھلاڑیوں کو منتخب کیا ہے۔ اپنے یوٹیوب چینل میں انہوں نے بیسٹ الیون کا اعلان کرتے ہوئے کہا کہ بابراعظم میری ٹیم کے کپتان ہوں گے انہوں نے جس طرح بیٹنگ کی وہ لاجواب تھی بابر نے اپنے پاور ہٹرز کے لیے پلیٹ فارم بنایا تاکہ جارحانہ بلے باز اپنا کام بخوبی انجام دے سکیں۔ آسٹریلوی اسپنر نے بابراعظم کو ٹیم کی قیادت کے لیے بہترین انتخاب قرار دیتے ہوئے کہا کہ بیٹنگ کے ساتھ ساتھ بابر کی کپتانی بھی شاندار رہی انہوں نے رنز بھی بنائے اور اپنے کھلاڑیوں کی بہترین انداز میں قیادت کر کے کامیابیاں حاصل کیں۔ اسپنر نے پاور ہٹر آصف علی کو بھی اپنی ٹیم میں شامل کیا ہے جنہوں نے دو اہم مواقعوں پر چھکے لگا کر میچ کا پانسہ پلٹا اور ٹیم کو کامیابی دلوائی۔
