اسلام آباد (نیوز ڈیسک ) سابق وزیر اعظم پاکستان عمران خان نے کہا ہے کہ کورکمانڈرز کانفرنس اعلامیے کی تائید کرتا ہوں، 9 مئی کے واقعات میں ملوث ملزمان کوکڑی سے کڑی سزا ملنی چاہیے۔
اڈیالہ جیل میں صحافیوں سے غیر رسمی گفتگو میں عمران خان کا کہنا تھاکہ 9 مئی کے واقعات پرکمیشن بنناچاہیے اور سی سی ٹی وی ویڈیوز نکالی جائیں۔
انہوں نے کہا کہ کورکمانڈرزکانفرنس اعلامیے کی تائید کرتا ہوں، 9 مئی کے واقعات میں ملوث ملزمان کوکڑی سے کڑی سزا ملنی چاہیے۔
ان کا کہنا تھاکہ ہم فوج کے خلاف نہیں نہ تصادم چاہتے ہیں، ہماری پارٹی فوج کے خلاف نہیں ہے۔
خواتین اور اقلیتوں کی مخصوص نشستوں کے حوالے سے عمران خان کا کہنا تھاکہ الیکشن کمیشن نے ہماری مخصوص نشستیں چھین کر جمہوریت کی دھجیاں اڑائیں، پی ٹی آئی کو مخصوص نشستیں نہ دے کر ہماری خواتین پر ظلم کیا گیا، الیکشن میں دھاندلی الیکشن کمیشن نے کی ہے۔
انہوں نے کہاکہ ہم الیکشن میں دھاندلی کے خلاف پُر امن احتجاج کرنا چاہتے ہیں، جمہوریت میں پُرامن احتجاج ہر جماعت کا حق ہے۔
ان کا کہنا کہنا تھاکہ 8 فروری سے کسی نے مجھ سے رابطہ نہیں کیا، مجھے معلوم ہےمجھ سے رابطہ کیوں نہیں کیا گیا بتانا نہیں چاہتا۔
ان کا کہنا ہے کہ آئی ایم ایف کوخط اس لیے لکھا کیونکہ سیاسی استحکام کےبغیرمعاشی استحکام ممکن نہیں، ہمارا 70 فیصد پیسہ قرضے اتارنے میں چلا جاتا ہے۔
واضح رہے کہ گزشتہ روز آرمی چیف کی زیر صدارت کور کمانڈرز کانفرنس میں اس عزم کا اظہار کیا گیا تھا کہ نو مئی میں ملوث افراد ، سہولتکاروں ، اشتعال دلانے والوں ، فوجی تنصیبات پر حملہ کرنے والوں کیخلاف قانون کے مطابق کارروائی عمل میں لائی جائے گی ۔
