اسلام آباد (عمران مگھرانہ سے ) سابق وزیر خوراک طارق بشیر چیمہ نے پنجاب حکومت سے فوری طور پرگندم کی خریداری کا مطالبہ کر تے ہوئے نگران دور حکومت میں امپورٹ کی گئی گندم کو مجرمانہ غفلت قرار دے دیا۔ تفصیلات کے مطابق طارق بشیر چیمہ نے نگران دور حکومت میں امپورٹ کی گئی گندم کو مجرمانہ غفلت قرار دے دیا۔انہوں نے کہا کہ تاریخ میں یہ پہلا موقع ہے پنجاب حکومت گندم کا ایک دانہ نہیں خرید رہی ہے، جواز یہ پیش کیا جارہا ہے ہم نے آٹا سستا کرنا ہے،اس لیے گندم نہیں خرید رہے تاہم آٹا تو شاید چند روپے سستا ہو گیا ہو مگرآبادی کا کتنا تناسب آج تباہ و برباد ہو رہا ہے۔ طارق بشیر چیمہ کا کہنا تھا کہ اس بار کسانوں کے ساتھ جو سلوک ہو رہا ہے اس کی وجہ سے اگلے سال گندم کی کاشت حد درجہ کم ہو جائے گی ۔ انہوں نے کہا کہ و فاقی حکومت گندم امپورٹ نہیں کرتی، صوبے اپنی ڈیمانڈ بھیجتے ہیں،ہر صوبہ اپنی سال کی ضرورت بتاتا ہے،یہ ہماری پروڈکشن ہے، اتنا ہمارے پاس سٹاک موجود ہے۔ جن علاقوں میں ہم رہتے ہیں یہ گندم میں سر پلس ایریاز ہیںتو پھر گندم کیوں اور کس کی اجازت سے امپورٹ ہوئی؟
