پی ٹی آئی کور کمیٹی سے فارغ ہونے والی مشعال یوسفزئی باضابطہ طور پر کے پی کابینہ کا حصہ بن گئیں ، نوٹیفکیشن جاری

اسلام آباد (نیوز ڈیسک) پاکستان تحریک انصاف (پی ٹی آئی) کی رہنما مشعال یوسفزئی باضابطہ طور پر خیبرپختونخوا کابینہ کا حصہ بن گئی ہیں۔مشعال یوسفزئی کو وزیراعلیٰ خیبرپختونخوا کی معاون خصوصی مقرر کیا گیا ہے، ایڈمنسٹریشن ڈیپارٹمنٹ نے ان کی تقرری سے متعلق نوٹیفکیشن جاری کردیا ہے۔ گزشتہ ماہ 27 ستمبر کو گورنر خیبرپختونخوا فیصل کریم کنڈی نے مشعال یوسفزئی کی بطور معاون خصوصی تقرری سے متعلق وزیراعلیٰ علی امین گنڈاپور کی جانب سے بھجوائی گئی سمری پر دستخط کرکے سمری دوبارہ وزیراعلیٰ کو بھجوائی تھی۔
رواں برس خیبرپختونخوا میں صوبائی حکومت کے قیام کے بعد مشعال یوسفزئی کو وزیراعلیٰ کی مشیر برائے سوشل ویلفیئر مقرر کیا گیا تھا۔ تاہم اگست میں وزیراعلیٰ نے مشعال یوسفزئی کو پارٹی امور میں مبینہ مداخلت کی شکایات پر پی ٹی آئی کور کمیٹی سے فارغ کردیا تھا۔
مشعال یوسفزئی کو کیوں نکالا گیا؟
اس وقت مشعال یوسفزئی پر یہ الزام سامنے آیا تھا کہ وہ پارٹی کے مرکزی معاملات میں بے جا مداخلت کررہی ہیں، مشعال یوسفزئی کے بارے میں یہ شکایات بھی سامنے آئی ہیں کہ وہ صوبے کوچھوڑکرمرکز میں زیادہ وقت گزارتی تھیں جس کے باعث ایک تو ان پر پارٹی کے مرکزی امور میں مداخلت کا الزام سامنے آیا اور دوسرا یہ کہ ان کے خلاف بانی پی ٹی آئی کوسینیئر قیادت کی جانب سے شکایات موصول ہوئی تھیں۔