دو بار کے اولمپک تمغہ جیتنے والے نیرج چوپڑا کی اہلیہ، ہیمانی مور نے اپنے کیریئر میں بڑا فیصلہ کرتے ہوئے 1.5کروڑ روپے کی ملازمت کی پیشکش کو مسترد کر دیا۔ ان کے والد چند مور نے اس کی وجہ بھی بتائی۔
ہیمانی، جو ایک سابقہ پیشہ ور ٹینس کھلاڑی رہی ہیں نے کھیل چھوڑ کر اسپورٹس بزنس کے شعبے میں اپنا نیا سفر شروع کرنے کا فیصلہ کیا ہے۔ انہوں نے ایک انٹرویو میں بتایا کہ اپنی خود کی وینچر پر فوکس کرنے کے لیے انہوں نے بیرون ملک کی ایک پرکشش آفر کو بھی ٹھکرا دیا۔
چند مور نے دنیک بھاسکر سے گفتگو مییں بتایا کہ اس نے امریکہ میں اسپورٹس سے متعلق 1.5کروڑ روپے کی نوکری کی پیشکش بھی ٹھکرا دی اور اب وہ اپنے بزنس کو دیکھیں گی ۔”
اس وقت ہیمانی یورپ میں نیرج کے ساتھ موجود ہیں، جو ایک مشکل اور بھرپور ٹریننگ شیڈول میں مصروف ہیں۔
دہلی یونیورسٹی سے پولیٹیکل سائنس کی ڈگری رکھنے والی ہیمانی نے امریکہ کی فرینکلن پیرس یونیورسٹی سے اسپورٹس اور فٹنس مینجمنٹ کی تعلیم بھی حاصل کی ہے۔
یہ جوڑا اس سال کے اوائل میں ہماچل پردیش کے ضلع سولن کے ایک ریزورٹ میں نجی تقریب کے دوران شادی کے بندھن میں بندھا۔ شادی کا اعلان خاموشی سے سوشل میڈیا پر کیا گیا، جس کے فوراً بعد وہ امریکہ روانہ ہو گئے۔ نیرج کے مصروف شیڈول کی وجہ سے ابھی تک باضابطہ استقبالیہ کا انعقاد نہیں ہو سکا۔
دوسری طرف، نیرج نے آئندہ ہونے والی سیلیسیا ڈائمنڈ لیگ (پولینڈ) سے دستبرداری اختیار کر لی ہے۔ یہ ایونٹ ان کے اور اولمپک چیمپئن ارشد ندیم کے درمیان ایک بڑی ٹکر کے طور پر دیکھا جا رہا تھا، لیکن دونوں کے نام فائنل انٹری لسٹ سے غائب ہیں جس سے مداح تجسس میں ہیں۔
کیا نیرج فٹ ہیں؟ تمام اشارے یہی بتاتے ہیں کہ ہاں۔ ان کی غیر موجودگی چوٹ کی وجہ سے نہیں ہے بلکہ یہ خیال ظاہر کیا جا رہا ہے کہ نیرج اپنی توانائی بچا کر بڑی چیمپئن شپ کے لیے تیاری کر رہے ہیں۔
اب ان کا اگلا بڑا ہدف ورلڈ ایتھلیٹکس چیمپئن شپ (ٹوکیو) ہے، جہاں مردوں کی جیولن تھرو کی مقابلے 17 اور 18 ستمبر کو ہوں گے۔ نیرج ایک بار پھر اپنی شاندار کیریئر میں نئی تاریخ رقم کرنے کے منتظر ہیں۔
