پاکستان ایئر فورس کی جانب سے پہلی بار پاک بھارت فضائی معرکے کی سنسنی خیز تفصیلات جاری کر دی گئیں ،پاک فضائیہ کے خطرناک ” کوبراز ” آخرہیں کون ؟

7 مئی کی رات نصف شب کے فوراً بعد، اسلام آباد میں پاکستان ایئر فورس (پی اے ایف) ہیڈکوارٹرز کے کامبیٹ آپریشنز سینٹر میں تناؤ کی ہلکی سی کیفیت چھا گئی۔

ریڈار اسکرینوں پر شمال کی جانب بھارتی فضائیہ (آئی اے ایف) کے درجنوں لڑاکا طیارے جمع ہوتے دکھائی دینے لگے، جو واضح جارحانہ ارادے کے ساتھ نقل و حرکت کر رہے تھے۔

چند ہی منٹوں میں پاکستان کی فضاؤں میں لڑاکا طیاروں کی گونج سنائی دینے لگی — جن میں حال ہی میں شامل کیے گئے جدید جے-10 سی طیارے بھی شامل تھے، جنہیں پی اے ایف کے سب سے مشہور یونٹس میں سے ایک، نمبر 15 اسکواڈرن “کوبراز” کے پائلٹس اڑا رہے تھے۔

تقریباً ایک ماہ بعد، پی اے ایف نے باضابطہ طور پر اس بات کی تصدیق کی جس پر پہلے ہی قیاس آرائیاں کی جا رہی تھیں — کہ کامرہ میں قائم نمبر 15 اسکواڈرن ہی نے اس کارروائی کی قیادت کی، جس کے دوران بھارتی فضائیہ کے چھ طیارے مار گرائے گئے۔ یہ معرکہ جنوبی ایشیا میں گزشتہ نصف صدی سے زائد عرصے میں ہونے والی سب سے بڑی فضائی جھڑپوں میں سے ایک قرار دیا جا رہا ہے۔

کامرہ میں تعینات نمبر 15 اسکواڈرن کے پائلٹس سے توقع ہے کہ انہیں اسی ماہ کے آخر میں ایک باقاعدہ تقریب میں اعزازات سے نوازا جائے گا۔

اس مشن میں اسکواڈرن کے 20 میں سے 18 جے-10 سی طیاروں نے حصہ لیا، جنہوں نے پاکستان کے دفاعی ردِعمل کے تحت ایک بڑے بھارتی فضائی فارمیشن کے خلاف انتہائی خطرناک انٹرسیپٹ آپریشن انجام دیا۔

پی اے ایف کے میڈیا ونگ کی جانب سے جاری بیان میں کوبراز کی وراثت اور پیشہ ورانہ صلاحیتوں کو سراہتے ہوئے کہا گیا کہ “1965 کی جنگ میں تاریخی فضائی معرکوں، جہاں فلائٹ لیفٹیننٹ امتیاز بھٹی نے بھارتی ویمپائر طیاروں کو مار گرایا، سے لے کر سوویت۔افغان جنگ کے دوران سرد جنگی دور کی نگرانی تک، یہ اسکواڈرن ہمیشہ جنگی تیاری کی علامت رہا ہے… اب 4.5 پلس جنریشن جے-10 سی طیاروں سے لیس کوبراز درستگی، جرات اور فضائی برتری کی عملی تصویر ہیں۔”

7 مئی کا یہ تصادم، پہلگام میں ایک مہلک حملے کے بعد بھارت کی جانب سے آپریشن سندور کے آغاز کے نتیجے میں پیش آیا، جس کے دوران دونوں جانب سے 120 سے زائد طیارے فضا میں موجود تھے۔

پاکستانی فوج کے سرکاری مؤقف کے مطابق، مار گرائے گئے بھارتی طیاروں میں تین رافیل، ایک مگ-29، ایک معراج-2000 اور ایک ایس یو-30 ایم کے آئی شامل تھے ، جن سب کو پی اے ایف کے جے-10 سی طیاروں سے داغے گئے پی ایل-15 بی وی آر میزائلوں سے نشانہ بنایا گیا۔ ہر فائرنگ نمبر 15 اسکواڈرن کے پائلٹس نے کی، جن کے نام جلد عوام کے سامنے لائے جائیں گے اور انہیں اعزازات سے نوازا جائے گا۔
ایک سینئر پی اے ایف افسر نے نام ظاہر نہ کرنے کی شرط پر بتایا کہ “اس آپریشن میں شامل پائلٹس کو جلد اعزاز دیا جائے گا۔ یہ ہمارے بہترین ہوا بازوں میں سے ہیں، اور ان کی کارکردگی خود بولتی ہے۔”

ذرائع کے مطابق، یہ جھڑپ ایک سوچے سمجھے “بیت اینڈ کاؤنٹر” حکمتِ عملی کا نتیجہ تھی۔ بھارتی دراندازی کی مصدقہ اطلاعات کے بعد پی اے ایف نے چار دفاعی کاؤنٹر ایئر فارمیشنز تعینات کیں اور اپنے الیکٹرو میگنیٹک اسپیکٹرم مینجمنٹ سسٹمز کے ذریعے 60 سے زائد بھارتی طیاروں کی نگرانی کی۔

افسر نے مزید بتایا کہ “ہم نے یہ جنگ اپنی شرائط پر لڑی۔ ہماری کِل چین مکمل طور پر فعال تھی۔ جب کمانڈ نے دورانِ پرواز ‘روک تھام’ سے ‘یقینی ہلاکت، اپنے نقصان سے بچاؤ’ کی حکمتِ عملی اپنائی تو کوبراز نے انتہائی درستگی اور کنٹرول کے ساتھ اپنا مشن مکمل کیا۔”

اہم اہداف میں رافیل طیارے سرفہرست تھے، جو 2019 میں شمولیت کے بعد بھارتی فضائیہ کا فخر سمجھے جاتے ہیں۔

“بھارتیوں کو امید تھی کہ رافیل گیم چینجر ثابت ہوں گے،” “اسی لیے ہم نے انہیں پہلا ہدف بنایا۔”

ابتدا میں 11 مئی کو بھارتی فضائیہ کے ڈائریکٹر جنرل ایئر آپریشنز، ایئر مارشل اے کے بھارتی نے صورتِ حال کو کم اہم ظاہر کرتے ہوئے صرف یہ کہا کہ “جنگ میں نقصانات ہوتے ہیں” اور دعویٰ کیا کہ تمام پائلٹس بحفاظت واپس آ گئے۔

تاہم 31 مئی کو سنگاپور میں شنگریلا ڈائیلاگ کے دوران بھارت کے چیف آف ڈیفنس اسٹاف جنرل انیل چوہان کو نقصانات تسلیم کرنا پڑے، جنہیں انہوں نے “تزویراتی غلطیوں” کا نتیجہ قرار دیا۔

اس اعتراف کے بعد بھارت میں شدید تنقید شروع ہو گئی۔ صورتحال سنبھالنے کی کوشش میں جنرل چوہان نے شرمندگی چھپانے کے لیے کرکٹ کی مبہم مثالیں دینا شروع کر دیں۔

کوبراز کی تاریخ

نمبر 15 اسکواڈرن 1956 میں قائم ہوا اور 1959 میں پاکستان کی پہلی مصدقہ فضائی فتح اپنے نام کی۔ اس یونٹ نے 1965 اور 1971 کی جنگوں میں کلیدی کردار ادا کیا اور بعد ازاں سوویت۔افغان جنگ کے دوران ڈیورنڈ لائن پر گشت اور انسدادِ دراندازی کی ذمہ داریاں انجام دیں۔

حالیہ فضائی معرکے سے قبل، اسکواڈرن نے 2019 میں آپریشن سوئفٹ ریٹورٹ میں حصہ لیا، جو بھارت کے بالاکوٹ فضائی حملے کے جواب میں پاکستان کا محتاط ردِعمل تھا۔ اس مشن میں کوبراز کے دو میراج-وی پی اے طیاروں نے ایچ-4 ایس او ڈبلیو گلائیڈ بموں کے ذریعے راجوری سیکٹر میں ناریان آرمی بیس کے قریب کھلے علاقے میں درست نشانہ بازی کی۔

اس مشن کے بعد کوبراز میں نمایاں تبدیلی آئی۔ 2022 میں یہ پی اے ایف کا پہلا اسکواڈرن بنا جس نے پرانے معراج طیاروں سے جدید چینی ساختہ چینگدو جے-10 سی ملٹی رول فائٹرز پر منتقلی کی۔ پرانے معراج طیارے نئے قائم کردہ نمبر 50 اسکواڈرن کو دے دیے گئے، جبکہ کوبراز کو باضابطہ طور پر پاکستان کی فرنٹ لائن فضائی اسٹرائیک یونٹ تسلیم کر لیا گیا۔

اے ای ایس اے ریڈار، جدید ڈیٹا لنکس اور بی وی آر صلاحیتوں سے لیس جے-10 سی کی شمولیت نے اسکواڈرن کی آپریشنل صلاحیتوں میں نمایاں اضافہ کیا، جس سے وہ فضائی برتری اور درست حملوں دونوں میں مؤثر کردار ادا کرنے کے قابل ہو گیا۔

اس یونٹ کی اہمیت میں مزید اضافہ اس حقیقت سے ہوتا ہے کہ موجودہ ایئر چیف مارشل ظہیر احمد بابر سدھو خود نمبر 15 اسکواڈرن کے سابق کمانڈر رہ چکے ہیں۔ 7 مئی کی رات، وہ خود اسلام آباد میں پی اے ایف کے اعصابی مرکز سے جنگی کارروائیوں کی نگرانی کر رہے تھے۔

ایک افسر نے بتایا کہ “کوبراز ہمارے سب سے تیز دانت ہیں۔ انہوں نے ہر جنگ میں اس قوم کا دفاع کیا ہے۔ 7 مئی بھی اس سے مختلف نہیں تھا — بس اس بار داؤ کہیں زیادہ بڑا تھا۔”

کامرہ کے اڈے پر فضا فخر سے لبریز مگر پیشہ ورانہ سنجیدگی کی حامل ہے۔ پی اے ایف کے سرکاری بیان کا اختتام ان الفاظ پر ہوا کہ “اپنی شاندار تاریخ کے دوران، نمبر 15 اسکواڈرن نے ہمیشہ غیر متزلزل آپریشنل مضبوطی اور اعلیٰ عسکری مہارت کا مظاہرہ کیا ہے۔”

بشکریہ : ڈان نیوز