پنجاب کے ضلع ترن تارن میں واقع مائی بھاگو لا کالج میں پیر کے روز ایک 20 سالہ طالب علم نے اپنی ہم عمرا ور جماعت طالبہ کو گولی مار کر قتل کرنے کے بعد خودکشی کی کوشش کی، پولیس کے مطابق یہ واقعہ کلاس روم میں نصب سی سی ٹی وی کیمروں میں ریکارڈ ہو گیا۔
بھارتی میڈیا کے مطابق حملہ آور کی شناخت ملیاں گاؤں کے رہائشی پرنس راج کے نام سے ہوئی ہے، جس نے نوشہرہ پنوں کی رہائشی طالبہ سندیپ کور پر فائرنگ کرنے کے بعد خود کو بھی گولی مار کر شدید زخمی کر لیا۔ پولیس کے ایک سینئر افسر نے بتایا کہ سندیپ کور موقع پر ہی دم توڑ گئیں جبکہ پرنس راج کو قریبی اسپتال میں زیر علاج رکھا گیا ہے۔
سی سی ٹی وی فوٹیج میں دیکھا جا سکتا ہے کہ پرنس راج بیگ کندھے پر ڈالے کلاس روم میں داخل ہوتا ہے اور سندیپ کور اور ایک اور طالبہ سے مختصر گفتگو کرتا ہے۔ بعد ازاں تینوں کلاس کے پچھلے حصے کی جانب جاتے ہیں۔ چند لمحوں بعد پرنس راج بیگ سے پستول نکال کر قریب سے سندیپ کور پر فائرنگ کر دیتا ہے اور پھر اسی ہتھیار کا رخ اپنی طرف کر لیتا ہے۔
ویڈیو میں فائرنگ کے فوراً بعد طلبہ کو خوف و ہراس میں مبتلا ہو کر کلاس روم سے باہر بھاگتے دیکھا جا سکتا ہے۔ حکام کے مطابق یہ حملہ کلاسز شروع ہونے سے کچھ دیر قبل پیش آیا۔
پولیس نے تصدیق کی ہے کہ سندیپ کور کی لاش پوسٹ مارٹم کے لیے بھجوا دی گئی ہے جبکہ واقعے کی وجہ تاحال واضح نہیں ہو سکی۔ تفتیشی حکام سانحے کی تحقیقات کے لیے سی سی ٹی وی فوٹیج کا جائزہ لے رہے ہیں۔
