مقبوضہ کشمیر میں قابض بھارت فوج نے نواسے کے سامنے اس کے نانا کو قتل کر دیا، دونوں کی تصویر نے دنیا میں غم و غصے کی لہر دوڑا دی۔
رپورٹ کے مطابق بھارت کی سینٹرل ریزرو پولیس فورس کے اہلکاروں اور حریت پسندوں کے درمیان جھڑپ کے دوران راہ چلتا ایک شہری جاں بحق ہو گیا جبکہ اس کا 3 سالہ نواسہ محفوظ رہا۔
جاں بحق شخص کے اہلخانہ کا کہنا ہے کہ انہیں بھارتی فوج نے قتل کیا ہے۔
انڈی پنڈنٹ اردو میں شائع رپورٹ کے مطابق فائرنگ کے تبادلے میں بھارتی فورسز کا ایک اہلکار ہلاک جبکہ 3 زخمی ہو گئے۔
ریڈیو پاکستان کی رپورٹ کے مطابق سوپور کے علاقے ماڈل ٹاؤن میں بھارتی فوج کے سرچ آپریشن کے دوران 2 سی آرپی ایف اہلکار ہلاک اور 2 زخمی ہو گئے ہیں جبکہ ایک کشمیری شہید ہوا ہے۔
تصادم کی اطلاع ملتے ہی مقامی پولیس اور شہری وہاں پہنچے تو ایک شخص کی لاش زمین پر پڑی تھی جبکہ اس کا 3 سالہ نواسہ ساتھ بیٹھا رو رہا تھا۔
جاں بحق شہری کے اہل خانہ نے کہا کہ فائرنگ کے شروع ہونے کے بعد سی آر پی ایف نے انہیں گاڑی سے اتار کر مار ڈالا۔
اس واقعہ کے بعد سوشل میڈیا پر نواسے کی اپنے نانا کی لاش کے ساتھ بیٹھنے کی تصویر وائرل ہو گئی اور ٹوئٹر پر ٹاپ ٹرینڈ بن گیا۔
