سیکیورٹیز اینڈ ایکسچینج کمیشن آف پاکستان (ایس ای سی پی) کے افسر اور سابق صحافی ساجد گوندل بازیاب ہو گئے ہیں، ان کے اہل خانہ نے تصدیق کر دی ہے۔
ساجد گوندل کے ٹوئٹر اکاؤئنٹ سے بھی ان کی واپسی کی تصدیق ہو گئی، اہل خانہ کے مطابق ساجد گوندل قریبی رشتہ دار کے گھر پہنچ چکے ہیں۔
خاندانی ذرائع کا کہنا ہے کہ ساجد گوندل میڈیا کے سامنے نہیں آئیں گے، وہ جلد گھر والوں کے ساتھ ہوں گے۔
ان کے خاندان کا کہنا ہے ککہ ساجد گوندل فی الوقت اپنی رہائش گاہ پر نہیں جائیں گے، گھر والوں سے کسی اور مقام پر ملیں گے، انہوں نے یہ فیصلہ میڈیا سے دور رہنے کے لیے کیا ہے۔
یاد رہے کہ سیکیورٹیز اینڈ کمیشن آف پاکستان (ایس ہی سی پی) کے جوائنٹ ڈائرکٹر ساجد گوندل جمعرات سے لاپتہ ہیں، پولیس کو ان کی سرکاری گاڑی کلٹس برنگ سلور رجسٹریشن نمبر 469 GAE جمعہ کو ایک زرعی تحقیقات مرکز کے باہر ملی تھی۔
ساجد گوندل ڈان اخبار میں صحافی کے طور پر فرائض سرانجام دیتے رہے ہیں، بعد ازاں انہوں نے ایس ای سی پی میں ملازمت اختیار کر لی تھی۔
ساجد گوندل کے اہلخانہ نے آج وزیراعظم ہاؤس کے باہر احتجاج کیا تھا، ان کی اہلیہ نے مطالبہ کیا تھا کہ حکومت ان کی مدد کرے اور ان کے شوہر کو بازیاب کرائے۔
