سابق گورنر سندھ محمد زبیر کو سابق وزیراعظم نواز شریف اور ان کی صاحبزادی مریم نواز کا ترجمان مقرر کر دیا گیا ہے۔
مسلم لیگ ن کی ترجمان مریم اورنگزیب نے اپنے بیان میں بتایا ہے کہ محمد زبیر سابق وزیراعظم اور مریم نواز سے متعلق ترجمانی کی ذمہ داری انجام دیں گے۔
ڈی جی آئی ایس پی آر نے ن لیگی رہنما محمد زبیر کی آرمی چیف سے 2 ملاقاتوں کی تصدیق کر دی
سی ای سی اجلاس کے بعد مسلم لیگی رہنماؤں کی جارحانہ گفتگو
انہوں نے بتایا کہ پارٹی کی مرکزی ترجمان اور سینٹرل انفارمیشن سیکٹری کی سربراہی میں ترجمانوں کی کمیٹی تشکیل دی گئی۔
ان کا کہنا تھا کہ کمیٹی میں مصدق ملک، محسن رانجھا، طلال چودھری، عظمیٰ بخاری اور عطااللہ تارڑ کمیٹی میں شامل ہیں۔
خیال رہے کہ گزشتہ دنوں نجی ٹی وی سے گفتگو کرتے ہوئے ڈی جی آئی ایس پی آر میجر جنرل بابر افتخار نے کہا تھا کہ محمد زبیر نے آرمی چیف جنرل قمر جاوید باجوہ سے دو ملاقاتیں کی تھیں۔
میجر جنرل بابر افتخار کے مطابق آرمی چیف سے محمد زبیر کی ایک ملاقات اگست کے آخر میں جب کہ ایک 7 ستمبر کو ہوئی تھی اور دونوں ملاقاتیں محمد زبیر کی درخواست پر ہوئیں۔
انہوں نے بتایا تھا کہ ملاقات میں نواز شریف اور مریم نواز سے متعلق باتیں ہوئیں۔
بعدازاں محمد زبیر نے آرمی چیف کے ساتھ ہونے والی اپنی ملاقاتوں کی تصدیق کی تھی مگر یہ دعویٰ کیا تھا کہ ان ملاقاتوں کا مقصد نواز شریف یا مریم نواز کے لیے کسی ریلیف کے بارے میں بات کرنا نہیں تھا اور نہ ہی وہ جنرل باجوہ سے نواز شریف کے نمائندے کے طور پر ملے تھے۔
اس سے قبل مریم نواز نے دعویٰ کیا تھا کہ نواز شریف کے کسی نمائندے نے آرمی چیف سے ملاقات نہیں کی، ان کی اس بات کے بعد ڈی جی آئی ایس پی آر نے محمد زبیر کی ملاقاتوں کی تصدیق کی تھی۔
