بالی ووڈ اداکار مکیش کھنہ کی جانب سے کَپل شرما شو کو بے ہودہ قرار دینے پر کَپل شرما بھی بول اٹھے ہیں۔
بھارتی میڈیا رپورٹس کے مطابق حال ہی میں معروف بھارتی سیریز مہا بھارت کی کاسٹ کو کَپل شرما شو میں شرکت کی دعوت دی گئی تھی لیکن اداکار مکیش کھنہ نے شو میں شریک ہونے سے انکار کر دیا تھا۔
مداحوں کی جانب سے انکار کی وجہ پوچھے جانے پر اداکار کا کہنا تھا کہ کَپل شرما کے شو میں انتہائی بے ہودہ سوالات پوچھے جاتے ہیں۔
انہوں نے بتایا کہ رامایان میں رام کا کردار ادا کرنے والی ارون گوویل سے بھی شو کے دوران عجیب و غریب مذاق کیے گئے۔
مکیش کھنہ کے بیان کے جواب میں کَپل شرما کا کہنا تھا کہ میں اور میری ٹیم ان مشکل حالات میں لوگوں کو چہروں پر مسکراہٹیں بکھیرنے کی کوشش کرتے ہیں۔
اپنے پیغام میں کَپل شرما کا کہنا تھا کہ ایسے وقت میں جب پوری دنیا ایک مشکل وقت سے گزر رہی ہے، لوگوں کے چہروں پر مسکراہٹ لانا ضروری ہے۔
انہوں نے کہا کہ اب یہ کسی بھی فرد پر منحصر ہے کہ وہ حالات میں سے خوشیاں نکالتا ہے یا خامیاں۔
انہوں نے اپنے بیان میں کہا کہ میں ہمیشہ روشن پہلو کو مدنظر رکھتے ہوئے مستقبل میں بھی اپنا کام جاری رکھوں گا۔
مکیش کھنہ نے اپنے پیغام میں لکھا کہ کَپل شرما شو ایک بدترین شو ہے جس میں اخلاقیات کے دائرے سے ہٹ کر مذاق کیے جاتے ہیں۔
اپنے انسٹاگرام اکاونٹ پر شیئر کی گئی پوسٹ میں اداکار کا کہنا تھا کہ یہ شو معنی خیز جملوں اور مذاق سے بھرا ہوا ہے، اس میں مرد عورتوں کے کپڑے پہنتے ہیں۔
انہوں نے لکھا کہ معنی خیز جملوں پر ناظرین پیٹ پکڑ کر ہنستے ہیں۔
واضح رہے بھارت چینل سونی انٹرٹینمنٹ پر نشر کیے جانے والے کَپل شرما شو کو جہاں کروڑوں لوگ پسند کرتے ہیں وہیں شو کے مواد کو بھی تنقید کا نشانہ بنایا جاتا رہا ہے
