معروف میسجنگ ایپلی کیشن واٹس ایپ نے اعلان کیا ہے کہ کمپنی اپنے صارفین کے لیے واٹس ایپ ویب سے آڈیو اور ویڈیو کال کا فیچر متعارف کرانے جا رہی ہے۔
واٹس ایپ سے معتلق اپ ڈیٹس کو شائع کرنے والی ویب سائٹ واٹس ایپ ویب کے مطابق اب صارفین ڈیسک ٹاپ ورژن یا لیپ ٹاپ اور کمپیوٹر پر بھی اپنے پیاروں کو کالز کر سکیں گے۔
اس سے قبل ڈیسک ٹاپ پر واٹس ایپ استعمال کرنے والے صارفین کے لیے کال کا آپشن موجود نہیں تھا۔
ویب سائٹ کے مطابق صارفین اپنے ڈیسک ٹاپ سے کسی کو کال کرنا چاہیں گے تو ایک طرف نئی ونڈو کھل جائے جس پر کال سے متعلق آپشنز ہوں گے۔
کمپنی کے مطابق بہت جلد یہ نیا فیچر صارفین کے ڈیسک ٹاپ تک پہنچا دیا جائے گا۔
واٹس ایپ ویب کے مطابق جب نیا فیچر تیاری کے مراحل سے نکل جائے تو صارفین کو آگاہ کر دیا جائے گا۔
یاد رہے سماجی رابطوں کے لیے استعمال ہونے والی معروف میسجنگ ایپ واٹس ایپ کے ایکٹو صارفین کی تعداد دو ارب سے تجاوز کر گئی ہے۔
واٹس ایپ انتظامیہ کی جانب سے رواں سال کے آغاز میں جاری بیان میں بتایا گیا تھا کہ 2018 میں ایپ استعمال کرنے والے صارفین کی تعداد ڈیڑھ ارب تھی۔
کمپنی کے مطابق سال 2016 میں صارفین کی تعداد ایک ارب تھی ۔
