پوپ فرانسس نے پہلی مرتبہ عوامی اجتماع میں ماسک پہن کر شرکت کی۔
منگل کو عالمی سلامتی کے لیے دعائیں مانگنے کی غرض سے بلائے گئے مذہبی رہنماوں کے اجتماع میں پوپ فرانسس سمیت تمام رہنماوں نے ماسک پہن کر شرکت کی۔
اجمتاع کے دوران پوپ فرانسس نے سفید رنگ کا ماسک پہنے رکھا۔ اس سے قبل انہوں نے ویٹی کین میں ہفتہ وار اجتماع کے لیے سفر کے دوران ماسک پہنا تھا۔
83 سالہ فرانسس نے آرتھوڈوکس عیسائیوں کے روحانی پیشوا پیٹریارک بارتھولومیو کے ہمراہ بیسیلیکا میں شرکت کی۔
دوسری جانب روم کے دوسرے شہروں میں بھی یہودیوں، عیسائیوں، سکھوں، ہندوں اور مسلمانوں نے اپنے اپنے عبادت خانوں میں عالمی امن و سلامتی کے لیے دعائیں کی۔
اٹلی میں گزشتہ چند ہفتوں کے دوران کورونا کے مثبت کیسز کی تعداد میں اضافے کے بعد یہ تقریب منقعد کی گئی تھی۔
یاد رہے اٹلی میں گزشتہ 24 گھنٹوں کے دوران 10 ہزار 784 کیسز ریکارڈ کیے گئے ہیں۔ سوموار کو اٹلی میں مثبت کیسز کی تعداد 9338 تھی۔
دوسری جانب ویٹی کین میں بھی کوورونا کے نئے کیسز سامنے آئے ہیں۔
رپورٹس کے مطابق ویٹی کین میں پوپ فرانسس کی حفاظت کے لیے مقرر کیے گئے 4 سیکیورٹی اہلکاروں کا ٹیسٹ بھی مثبت آیا تھا۔
دعائیں مانگنے اور مدد طلب کرنے کی غرض سے منقعد کیا جانے والے سالانہ اجتماع کا آغاز 1986 سے کیا گیا تھا۔
رواں سال اجتماع کا مقصد کورونا کے پھیلاو اور عالمی امن و امان کے لیے دعا کرنا تھا۔
پوپ فرانسس سمیت دیگر رہنماوں نے اجتماع میں اپنے خطاب کے دوران چہرے سے ماسک ہٹایا تھا۔
