لاہور: پاکستان تحریک انصاف کے رہنما جہانگیر ترین لندن سے وطن واپس پہنچ گئے۔
جہانگیر ترین نجی ائیر لائن سے لاہور پہنچے، ان کی اہلیہ بھی ساتھ تھیں۔
ان کے استقبال کے لیے چند قریبی دوست ائیر پورٹ پر موجود تھے مگر پاکستان تحریک انصاف کا کوئی ان کے استقبال کے لیے نہیں آیا۔
اس سے قبل یہ خبریں گردش میں تھیں کہ جہانگیر ترین کے بیٹے علی ترین بھی ان کے ساتھ واپس آ رہے ہیں مگر وہ ابھی تک نہیں آئے۔
ائیرپورٹ پر گفتگو
لاہور ائیرپورٹ پر میڈیا سے گفتگو کرتے ہوئے جہانگیر ترین نے کہا کہ ابھی وہ کچھ دن آرام کریں گے، سیاست میں فعال حصہ لینے کے متعلق ابھی کچھ نہیں سوچا۔
انہوں نے بتایا کہ وہ گزشتہ 7 برس سے ہر سال علاج کے لیے باہر جاتے ہیں، اس سال بھی لندن جانے کی یہی وجہ تھی۔۔
جہانگیر ترین نے کہا کہ اپوزیشن کاکام الزام لگانا ہے جس کا جواب دینا ضروری نہیں، اللہ کا شکر ہے میرا تمام کاروبار صاف شفاف ہے۔
جہانگیر ترین ملک میں چینی بحران کے بعد شوگر کمیشن کی رپورٹ کے بعد لندن روانہ ہوگئے تھے اور تقریباً 7 ماہ لندن میں قیام کیا۔
جہانگیر ترین کو شوگر کمیشن اور ایف آئی اے نے طلب کیا تھا لیکن انہوں نے پیش ہونے سے معذرت کرلی تھی۔
