امریکی صدر ڈونلڈ ٹرمپ کیلئے دوبارہ صدر منتخب ہونے کی راہیں مسدود ہوتی جا رہی ہیں تاہم اس کے باوجود وہ وائٹ ہاؤس چھوڑنے کیلئے تیار نہیں ہیں۔
امریکی انتخابات میں دھاندلی اور ووٹ چرانے سے متعلق بیانات پر ڈونلڈ ٹرمپ کو شدید تنقید کا سامنا ہے سوشل میڈیا پر بالخصوص ٹوئٹر پر ان پر مزاحیہ تبصرے کئے جا رہے ہیں۔
حال ہی میں وزیر اعظم عمران خان کی سابقہ اہلیہ جمائما گولڈ اسمتھ نے امریکی صدر کی نقل پر مبنی ایک ویڈیو شیئر کرتے ہوئے ان پر مزاحیہ تبصرہ کیا ہے۔
جمائما گولڈ اسمتھ کی شیئر کی گئی ویڈیو میں ایک شخص ڈونلڈ ٹرمپ کی نقل اتار رہا ہے۔
جمائما گولڈ اسمتھ کی طرف سے شیئر کی گئی ویڈیو میں دیکھا جا سکتا ہے کہ ویڈیو میں موجود شخص وائٹ ہاؤس سے جانے کا سن کر زمین پر بچوں کی طرح ضد کرتے ہوئے پاؤں مارہا ہے اور کہہ رہا ہے کہ میں نہیں جاؤں گا۔
جمائما گولڈ اسمتھ نے ویڈیو کے کیپشن میں لکھا کہ وائٹ ہاؤس میں آج رات کے مناظر۔
علاوہ ازیں ٹوئٹر پر متعدد پاکستانیوں نے میمز کی شکل میں امریکی انتخاب اور ٹرمپ پر تبصرے کئے ہیں۔
ٹوئٹر پر ایک صارف نے لکھا کہ ٹرمپ الیکشن کے بعد تحریک کی تیاری کر رہے ہیں۔
اسی طرح ایک اور ٹوئٹر صارف نے لکھا کہ جوبائیڈن اور ڈونلڈ ٹرمپ دونوں الیکشن میں کامیابی کا اعلان کر چکے ہیں اور امریکیوں کا ردعمل کچھ یوں ہے۔
واضح رہے ڈونلڈ ٹرمپ نے ٹوئٹر پر اپنے پیغام میں کہا تھا کہ ہم بڑی فتح کی جانب گامزن ہیں لیکن ان کے مخالفین الیکشن چرانے کی کوشش کر رہے ہیں، ہم انہیں ایسا نہیں کرنے دیں گے، پولز ختم ہونے کے بعد ووٹ نہیں ڈالا جا سکتا۔
