شہبازشریف کے اہلخانہ کے لیے منی لانڈرنگ کرنے والے شخص کا بیان سامنے آ گیا

لاہور: شہباز شریف کے اہلخانہ کے لیے منی لانڈرنگ کرنے والے شخص شاہد رفیق کا بیان سامنے آیا ہے جس میں اس نے 24 لاکھ 30 ہزار 145 ڈالرز کی منی لانڈرنگ کا اعتراف کیا ہے۔

شاہد رفیق نے وعدہ معاف گواہ کے طور پر یہ اعترافی بیان چیئرمین نیب اور جوڈیشل مجسٹریٹ کو ریکارڈ کرایا ہے۔

وعدہ معاف گواہ نے بتایا کہ اس نے 2008 اور 2009 میں 24 ٹی ٹیز کا بندوبست کیا، میں ان 24 ٹرانزیکشن کا اعتراف کرتا ہوں۔

اس کا کہنا تھا کہ اس نے نصرت شہباز، حمزہ شہباز، سلمان شہباز اور رابعہ عمران کے اکاؤنٹس میں رقم بھی منتقل کی۔ وہ ان رقوم پر کمیشن وصول کیا کرتا تھا۔

وعدہ معاف گواہ کے مطابق 2008 میں قاسم قیوم شریف فیملی کے لیے بیرون ممالک سے ترسیلات کا بندوبست کرتا تھا۔

اس نے اعتراف کیا کہ جو ٹی ٹیز بیرون ملک سے لگوا کر بھیجی جاتیں وہ قاسم قیوم کے ملازمین کے نام پر ہوتی تھیں جبکہ ایم ایس عثمان انٹرنیشنل منی ایکس چینج سے ٹی ٹیز لگوائی جاتی تھیں۔