لاہور: پولیس نے پاکستان مسلم لیگ ن کے سیکرٹری جنرل عمران نذیر کو حراست میں لے لیا ہے۔
تفصیلات کے مطابق عمران نذیر کو پولیس اور ڈولفن کی ٹیمیں خواجہ نذیر کو لے کر تھانے روانہ ہو گئی ہیں۔
خواجہ نذیر کے مطابق انہیں کہا گیا ہے کہ آپ کی گاڑی نیب آفس پر پتھر پھیکنے پر استعمال ہوئی۔
واضح رہے کہ پاکستان مسلم لیگ ن کی رہنما مریم نواز کی نیب پیشی کے وقت نیب آفس کے باہر شدید ہنگامہ آرائی ہوئی تھی اور پتھراؤ بھی کیا گیا۔
جس کے بعد کچھ تصاویر اور ویڈیوز سامنے آئیں جن میں دیکھا جا سکتا تھا کہ پتھر گاڑیوں میں بھر کر لائے گئے ہیں۔
دعویٰ کیا گیا کہ مسلم لیگ ن کے رہنما اپنی گاڑی میں میں پتھروں سے بھرے شاپر بھر کر لائے تھے جو نیب اہلکاروں کو مارنے کے لیے استعمال کیے گئے۔
پاکستانی میڈیا پر اس گاڑی کا نمبر بھی دکھایا گیا، تاہم اب اس گاڑی کے مالک مسلم لیگ ن کے رہنما افتخار چھچھر بھی منظر عام پر آ گئے ہیں جنہوں نے اردو پوائنٹ کے پروگرام میں اینکر فرخ شہباز وڑائچ سے گفتگو کرتے ہوئے کہا کہ کل سے میڈیا پر بلاوجہ میری گاڑی کا نمبر بار بار دکھایا جا رہا ہے۔
انہوں نے کہا کہ جس دن مریم نواز کی پیشی تھی، تو میں نے مارکیٹ سے صدقے کے لیے گوشت لیا، اس کے علاوہ 3 شاپر پھولوں کے لیے۔ جس کے بعد ہم رائےونڈ پہنچے۔
ان کا کہنا تھا کہ جاتی امرا میں گاڑی بغیر چیکنگ کے نہیں جاتی۔ گاڑی میں مزید لوگ آنے کی وجہ سے پھولوں اور گوشت کے شاپر پچھلی سیٹ کے نیچے رکھ دیئے گئے۔
لیگی رہنما نے مزید کہا کہ میرے پاس فوٹیج موجود ہے جس میں پھولوں کے شاپر واضح دیکھے جا سکتے ہیں۔
انہوں نے کہا کہ میں چیلنج کرتا ہوں کہ جاتی امرا سے لے کر نیب آفس تک اور نیب آفس سے ہنگامہ آرائی تک میری گاڑی کا دروازہ ایک بار بھی کھلا ثابت ہو جائے تو میں سزا بھگتنے کے لیے تیار ہوں۔
