شادی کو عمر بھر کا بندھن سمجھا جاتا ہے جس میں دو افراد ایک دوسرے کے ساتھ جنم جنم کا ساتھ نبھانے کا عہد کرتے ہیں مگر یہ رشتہ ٹوٹتا بھی رہتا ہے اور جڑتا بھی رہتا ہے۔
لیکن اگر انسان اپنے آپ سے ہی شادی کر لے تو مضحکہ خیز ہونے کے باوجود ایسا رشتہ ہے جو واقعی آخری سانس تک قائم رہتا ہے۔
ایسا ہی ایک واقعہ برازیل میں پیش آیا جہاں ایک ڈاکٹر نے منگیتر سے جھگڑے کے بعد خود سے شادی کر لی۔
برازیل کی ریاست باہیا کے 33 سالہ پلاسٹک سرجن نے خود سے شادی کرکے سب کو حیرت میں ڈال دیا۔ انہوں نے یہ شادی 40 مہمانوں کی موجودگی میں کی۔
برازیل کے میڈیا کے مطابق ڈاکٹر رابیلو کی ایک ماہ قبل منگنی ہوئی تھی اور دونوں شادی کرنے جا رہے تھے تاہم کورونا لاک ڈاؤن کی وجہ سے اکٹھے رہنے کے بعد ان میں جھگڑے شروع ہو گئے۔
یہ جھگڑا اسقدر بڑھا کہ خاتون نے منگنی توڑ دی اور اپنے راستے جدا کر لیے۔
ڈاکٹر ڈیاگو رابیلو نے رشتہ ٹوٹ جانے کے بعد خود سے ہی شادی کا فیصلہ کیا اور اپنے قریبی دوستوں اور رشتہ داروں کو ریاست بہایا کے ایک جزیرے پر بلا کر ان کے سامنے اپنے آپ سے شادی کر لی۔
اس تقریب میں دو درجن کے قریب خواتین بھی شامل تھیں جن میں کئی ان کی دوست بھی تھیں مگر انہوں نے کسی خاتون سے شادی نہ کرنے کا فیصلہ کر لیا۔
ڈاکٹر ڈیاگو نے اپنی مذہبی و ثقافتی روایات کے مطابق شادی کی تمام رسومات ادا کیں اور شادی کی تقریب کی تصاویر بھی سوشل میڈیا پر شیئر کیں، جو دیکھتے ہی دیکھتے دنیا بھر میں وائرل ہوگئیں۔
دنیا بھر میں یہ خبر بجلی کی طرح پھیلی اور سوشل میڈیا پر صارفین مختلف قسم کے تبصرے کر رہے ہیں۔
