پاکستان نے زمبابوے کو پہلے ٹی ٹوئنٹی میچ میں شکست دے دی

لاہور: پاکستان اور زمبابوے کے مابین کھیلے جانے والے پہلے ٹی ٹونٹی میچ میں پاکستان نے مہمان ٹیم کو 4 وکٹوں سے شکست دے دی ہے۔
دونوں ٹیموں کے درمیان کھیلے گئے پہلے ٹی ٹونٹی میچ میں مہمان ٹیم نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 156 رنز بنائے تھے۔
پاکستان نے ہدف کے تعاقب میں بیٹنگ کا آغاز کیا تو 18.5 اوورز میں چار وکٹوں کے نقصان پر کھیل کا نتیجہ اپنے نام کر لیا۔
میچ کے آغاز میں زمبابوے کے کپتان نے ٹاس جیت کر پہلے بیٹنگ کا فیصلہ کیا۔ میچ سے قبل میڈیا نمائندگان سے بات کرتے ہوئے قومی ٹیم کے کپتان بابر اعظم کا کہنا تھا کہ اگر میں پہلے ٹاس جیتتا تو پہلے بیٹنگ کا ہی فیصلہ کرتا۔
ان کا کہنا تھا کہ مثبت ہو کر کھیلیں گے اور کوشش کریں گے کہ مہمان ٹیم کو جلد آؤٹ کر دیں۔
٘زمبابوے کی جانب سے ویسلے مدیور نے 70 رنز کی ناقابل شکست اننگ کھیلی۔ سین ولیم 25 رنز بنا دوسرے نمایاں بلے باز رہے، مہمان ٹیم کا اور کوئی کھلاڑی شاہینوں کے سامنے نا ٹک سکا۔
پاکستان کی جانب سے حارث روف اور وہاب ریاض نے دو دو کھلاڑیوں کو آوٹ کیا جب کہ محمد حسنین اور عثمان قدیر نے ایک ایک کھلاڑی کو پویلین کی راہ دکھائی۔
پاکستان نے اپنی اننگ کا آغاز کیا تو کپتان بابر اعظم نے 55 گیندوں کا سامنا کرتے ہوئے 82 رنز بنائے جبکہ محمد حفیظ 36 رنز بنا کر دوسرے نمایاں بلے باز رہے۔
زمبابوے کے گیند باز بی مزارابانی نے دو کھلاڑیوں کو آوٹ کیا۔
واضح رہے پاکستان نے زمبابوے کے خلاف تین ایک روزہ میچوں کی سیریز دو ایک سے اپنے نام کی تھی۔
دونوں ٹیموں کے درمیان اب تک 11 ٹی ٹونٹی میچز کھیلے جا چکے ہیں اور تمام میں پاکستان نے کامیابی حاصل کی ہے۔