افغانستان کا معروف صحافی کار بم دھماکے میں جاں بحق

کابل: افغانستان کے دارالحکومت کابل میں افغان صحافی کو کار بم دھماکے میں ہلاک کر دیا گیا۔
افغان میڈیا کے مطابق دھماکہ خیز مواد افغان صحافی یما سیاوش کی گاڑی میں نصب کیا گیا تھا۔
پولیس ذرائع نے بتایا ہے کہ صحافی جیسے ہی گھر کے قریب پہنچے، کار میں نصب بم دھماکے سے پھٹ گیا۔
دھماکے کے نتیجے میں یما سیاوش سمیت تین افراد ہلاک ہو گئے ہیں۔
میڈیا رپورٹ میں بتایا جا رہا ہے کہ صحافی کے قتل کی ذمہ داری کسی گروپ کی جانب سے قبول نہیں کی گئی۔
وزارت داخلہ کی جانب سے جاری بیان میں بتایا گیا ہے کہ یماسیاوش پر حملے کا ذمہ دار طالبان کا حقانی نیٹ ورک ہے۔
ان کے قتل کے بعد مختلف سیاسی اور سماجی شخصیات کی جانب سے مذمتی بیانات سامنے آرہے ہیں۔
کابل میں امریکی سفارت خانے کی جانب سے جاری بیان میں اس قتل کی مذمت کرتے ہوئے اسے آزادی اظہار رائے پر حملہ قرار دیا۔
یاد رہے یما سیاوش افغانستان کے معروف نجی چینل طلوع میں اینکر کے فرائض سرانجام دے چکے ہیں۔
حال ہی میں ان کے بارے میں خبر آئی تھی کہ انہوں نے ٹی وی شو کی میزبانی چھوڑ کر افغانستان کے ایک بینک میں مشیر برائے عوامی تعلقات عامہ کے عہدے پر فائز ہو گئے تھے۔
حالات حاضرہ پر گہری نظر رکھنے والے یما سیاوش طلوع ٹی وی کا ایک اہم حصہ رہ چکے ہیں۔