راولپنڈی: پاکستان نے دوسرے ٹی ٹوئنٹی میچ میں زمبابوے کو 8 وکٹوں سے شکست دے کر تین میچوں کی سیریز دو صفر سے جیت لی۔
پنڈی اسٹیڈیم میں کھیلے جانے والے میچ میں پاکستان نے زمبابوے کی جانب سے دیا گیا 135 رنز کا ہدف باآسانی کپتان بابراعظم اور نوجوان بلے باز حیدر علی کی شاندار بلے بازی کی بدولت حاصل کر لیا۔
حیدر علی نے 43 گیندوں پر 6چوکوں اور تین فلک شگاف چھکوں کی بدولت 66 رنز کی ناقابل شکست اننگز کھیلی جب کہ کپتان بابراعظم 51 رنز بنا کر نمایاں رہے۔
قومی ٹیم نے ٹاس جیت کر پہلے فیلڈنگ کا فیصلہ کیا۔ زمبابوے نے پہلے بلے بازی کرتے ہوئے مقررہ 20 اوورز میں 7 وکٹوں کے نقصان پر 134 رنز بنائے۔
زمبابوے کی جانب سے برل نے 32، مدھویر نے 24 اور چیگومبورا نے 18 رنز کی اننگز کھیلی۔
پاکستان کی جانب سے حارث رؤف اور عثمان قادر تین تین وکٹیں لینے میں کامیاب ہوئے۔
پاکستان اور زمبابوے کے مابین کھیلے جانے والے دوسرے ٹی ٹونٹی میچ میں گرین شرٹس نے ٹاس جیت کر پہلے فیلڈنگ کا فیصلہ کیا۔
اس سے قبل گزشتہ روز کھیلے گئے میچ میں پاکستان نے زمبابوے کو شکست دی تھی۔
دونوں ٹیموں کے درمیان اسی میدان میں ہونے والے پہلے میچ میں زمبابوے نے ٹاس جیت کر پہلے بیٹنگ کا فیصلہ کیا تھا جس پر قومی ٹیم کے کپتان بابر اعظم کا کہنا تھا کہ اگر میں ٹاس جیتتا تو میں بھی پہلے بیٹنگ کرتا۔
دوسرے ٹی ٹونٹی میچ کے لیے قومی ٹیم میں کوئی تبدیلی نہیں کی گئی جب کہ زمبابوے کی ٹیم ایک تبدیلی کے ساتھ میدان میں اتری ہے۔
مہمان ٹیم نے ڈونلڈ ٹریپینو کوٹنڈائی چتارا کی جگہ ٹیم کا حصہ بنایا ہے۔ دونوں ٹیموں کے درمیان کھیلے گئے پہلے ٹی ٹونٹی میچ میں مہمان ٹیم نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 156 رنز بنائے تھے۔
پاکستان نے ہدف کے تعاقب میں بیٹنگ کا آغاز کیا تو 18.5 اوورز میں چار وکٹوں کے نقصان پر کھیل کا نتیجہ اپنے نام کر لیا۔ زمبابوے کی جانب سے ویسلے مدیور نے 70 رنز کی ناقابل شکست اننگ کھیلی۔ سین ولیم 25 رنز بنا دوسرے نمایاں بلے باز رہے، مہمان ٹیم کا اور کوئی کھلاڑی شاہینوں کے سامنے نا ٹک سکا۔
پاکستان کی جانب سے حارث روف اور وہاب ریاض نے دو دو کھلاڑیوں کو آوٹ کیا جب کہ محمد حسنین اور عثمان قدیر نے ایک ایک کھلاڑی کو پویلین کی راہ دکھائی۔
پاکستان نے اپنی اننگ کا آغاز کیا تو کپتان بابر اعظم نے 55 گیندوں کا سامنا کرتے ہوئے 82 رنز بنائے جبکہ محمد حفیظ 36 رنز بنا کر دوسرے نمایاں بلے باز رہے۔
زمبابوے کے گیند باز بی مزارابانی نے دو کھلاڑیوں کو آوٹ کیا۔
واضح رہے پاکستان نے زمبابوے کے خلاف تین ایک روزہ میچوں کی سیریز دو ایک سے اپنے نام کی تھی۔
دونوں ٹیموں کے درمیان اب تک 11 ٹی ٹونٹی میچز کھیلے جا چکے ہیں اور تمام میں پاکستان نے کامیابی حاصل کی ہے۔
