ٹرمپ اور ان کے بیٹے بضد، اہلیہ کا نتائج تسلیم کرنے کا مشورہ

نیویارک: امریکی صدر ڈونلڈ ٹرمپ کی انتخابات میں شکست کے بعد عدالتی کارروائی کی ضد ختم نا ہوئی تو ان کی اہلیہ میلانیا اور داماد میدان میں آگئے۔
امریکی میڈیا رپورٹس کے مطابق صدر کی اہلیہ میلانیا ٹرمپ اور ان کے داماد جیرڈ کشنر نے انہیں مشورہ دیا ہے کہ وہ ضد چھوڑ کر انتخابات کے نتائج کوتسلیم کر لیں۔
امریکی میڈیا نے دعوی کیا ہے کہ صدر کے داماد جیرڈ کشنر نتائج کا اعلان ہونے کے بعد خود ان کے پاس گئے اور ان سے انتخابات کے نتائج کو تسلیم کرنے کی درخواست کی۔
دوسری جانب صدر کے بڑے بیٹے نے بھی دوران انتخابات اپنے والد کی جدوجہد کو سراہا۔
میڈیا کے مطابق صدر کے دونوں بیٹوں ڈونلڈ جون اور ایریک نے ری پبلکن جماعت کے اہم رہنماوں سے ملاقات کی اور ان سے صدر کی حمایت جاری رکھنے کی درخواست کی۔
ان کا کہنا تھا کہ ری پبلکن رہنما عوامی سطح پر نتائج کو مسترد کرتے رہیں۔
انہوں نے کہا کہ انتخابات میں ری پبلکنز کا مینڈیٹ چوری کیا گیا ہے جس کو حاصل کرنے کے لیے قانونی کارروائی کی جائے گی۔
امریکی انتخابات کے نتائج سامنے آنے سے قبل ڈونلڈ ٹرمپ بھی اس بات پر زور دیتے رہے ہیں کہ اگر قانونی ووٹوں کی گنتی کی جائے تو وہ الیکشن جیت چکے ہیں۔
اپنے ٹویٹر پیغام کے ذریعے انہوں نے متعدد بار اپنے حریف امیدوار جوبائیڈن پر دھاندلی کے الزامات لگاتے ہوئے بتایا کہ الیکشن وہ جیتے ہیں۔
ایک ٹویٹ میں ان کا کہنا تھا کہ ان کو دھوکہ دیا گیا ہے، جوبائیڈن افریقی نسل کے امریکیوں کو انتخابات جیتنے کے لیے استعمال کر رہے ہیں۔
انہوں نے ایک ٹویٹ میں بتایا تھا کہ الیکشن کے ابتدائی نتائج کے مطابق میں جیت رہا تھا لیکن اچانک سے ریاستیں جوبائیڈن کے نام ہونے لگی۔
ٹویٹر کی جانب سے صدر ٹرمپ کی نیتجے سے متعلق دس ٹویٹس پر لیبل لگاتے ہوئے ہائیڈ کیا گیا۔
انتخابات کے نتیجے کے بعد انہوں نے جوبائیڈن کی فتح کے خلاف عدالت جانے کا بھی اعلان کیا تھا۔