لاہور: قومی کرکٹ ٹیم کے سابق فاسٹ بالر شعیب اختر نے کہا ہے کہ اظہر علی کو ٹیسٹ ٹیم کی کپتانی سے ہٹایا جانا زیادتی ہوگی۔
اپنے یو ٹیوب چینل پر جاری ویڈیو میں شعیب اختر کا کہنا تھا کہ اظہر علی کو ایک خراب کھیل کے بعد ٹیسٹ کپتانی سے نہیں ہٹایا جانا چاہیے۔
انہوں نے تسلیم کیا کہ اظہر علی نے انگلینڈ کے خلاف کھیلے جانے والے پہلے ٹیسٹ میچ کی دوسری اننگز میں غلطیاں کیں، انہوں نے جیت کی پوزیشن میں ہوتے ہوئے بھی فیلڈنگ میں غلطی کی اور میچ ہاتھ سے نکال دیا۔
تاہم شعیب اختر کا کہنا تھا کہ مجھے یقین ہے کہ اظہر علی آئندہ میچوں میں اپنی کارکردگی کو بہتر بنائے گا۔
ان کا کہنا تھا کہ مجھے یہ دیکھ کر ناامیدی ہوتی ہے کہ کسی طرح کے حالات بھی ہوں برداشت کھلاڑیوں کو کرنا پڑتا ہے جب کہ انتظامیہ ہمیشہ وہی رہتی ہے۔
بابر اعظم کو ٹیسٹ ٹیم کا کپتان بنائے جانے کی خبروں پر ان کا کہنا تھا کہ بابر ایک کامیاب کپتان ہےلیکن اگر بابر کو لگتا ہے کہ وہ اپنی کارکردگی کو بہتر رکھتے ہوئے تینوں فارمیٹس کی کپتانی کو سنبھال سکتا ہے تو اسے ضرور کپتان بننا چاہیے۔
یاد رہے بابر اعظم قومی کرکٹ ٹیم کے ون ڈے اور ٹی ٹونٹی کپتان ہیں، اظہر علی کو ٹیسٹ کپتانی سے ہٹائے جانے کی صورت میں بابر اعظم کپتانی کے لیے مضبوط امیدوار ہیں۔
ٹیسٹ کپتان اظہر علی حال ہی میں انگلینڈ کے خلاف کھیلے جانے والے پہلے ٹیسٹ میچ میں ناکامی کے بعد تنقید کی زد میں ہیں۔
اس سے قبل سابق کپتان وسیم اکرم بھی بابر اعظم کو ٹیسٹ ٹیم کا کپتان بنائے جانے کی حمایت کر چکے ہیں۔
ان کا کہنا تھا کہ بابر اعظم کا کام رنز بنانا ہے، وہ اپنی کارکردگی کو بہتر رکھ کر تینوں فارمیٹس کا کہتان بن سکتا ہے۔
انہوں نے سوال کیا کہ کیا ویراٹ کوہلی اور کین ولیم سن کپتان اور بہترین بلے باز نہیں ہیں۔
