مائیکروسافٹ کے بانی بل گیٹس نے کورونا وائرس کی وبا کے خاتمے کے بعد کی زندگی کے حوالے سے پیش گوئیاں کی ہیں۔
کورونا وائرس کی روک تھام اور ویکسینز کے حوالے سے مثبت رپورٹس کے بعد بل گیٹس نے وبا کے بعد کی زندگی کے بارے اپنے خیالات کا اظہار کیا ہے۔
ایک انٹرویو کے دوران بل گیٹس نے کہا کہ رواں سال کورونا وائرس کی وبا کے نتیجے میں دفتری امور اور سفر میں آنے والی تبدیلیاں وبا کے خاتمے کے بعد بھی برقرار رہیں گی۔
ان کا کہنا تھا کہ بڑی تبدیلیوں میں سے ایک یہ ہو گی کہ کس طرح کمپنیاں کام سے متعلق سفر کا انتظام کرتی ہیں۔
بل گیٹس نے پیش گوئی کی کہ 50 فیصد کاروباری سفر اور دفاتر کے 30 فیصد سے زیادہ دن ختم ہو جائیں گے۔
جس طرح کاروباری سفر کیلئے ایک سے دوسری جگہ جا کر لوگوں سے مل کر کاروباری امور طے کئے جاتے تھے، بل گیٹس کے مطابق اب یہ سنہری اصول نہں رہے گا۔
انہوں نے کہا کہ بیشتر کمپنیاں اس طرح کے کاروباری دوروں سے گریز کریں گی۔
بل گیٹس کا کہنا تھا کہ جہاں تک گھر سے کام کرنے کی بات ہے کچھ کمپنیاں ایک یا دوسری انتہا کو ترجیح دیں گی، یعنی کہیں سے بھی ملازمین کو ہمیشہ کام کرنے کی اجازت دی جائے گی یا کسی ایک کو بھی یہ سہولت نہیں دی جائے گی۔
مائیکروسافٹ کے بانی کا کہنا تھا کہ آن لائن ملاقاتوں کا ایک بڑا نقصان یہ ہے کہ ہم نئے لوگوں سے نہیں مل سکیں گے، اسی وجہ سے وہ اس سال نئے دوست نہیں بنا سکے کیونکہ انہیں لوگوں سے ملنے کا موقع ہی نہیں ملا۔
ٹیکنالوجی کی متعدد کپمنیوں نے مستقبل میں اپنے عملے کو گھر سے کام کرنے کی اجازت دینے کا فیصلہ کیا ہے۔
فی الحال فیس بک، سلیک اور دیگر نے ملازمین کو یہ سہولت فراہم کی ہے۔
اس کے مقابلے میں مائیکروسافٹ میں ہائبرڈ پالیسی کو اختیار کیا گیا ہے جس میں آدھے عملے کو ایک ہفتے تک کام کرنا ہوتا ہے۔
