پاکستان کی وفاقی حکومت نے کورونا وائرس کی وبا کی دوسری لہر کے پیش نظر پیر کو ملک بھر کے تعلیمی ادارے 26 نومبر سے بند کرنے کا اعلان کر دیا ہے۔
اسلام آباد میں وفاقی وزیر تعلیم شفقت محمود اور مشیر صحت ڈاکٹر فیصل سلطان نے بین الصوبائی وزرائے تعلیم کے اجلاس کے بعد تعلیمی ادارے بند کرنے کے فیصلے کا اعلان پریس کانفرنس میں کیا۔
وفاقی وزیر تعلیم شفقت محمود نے کہا کہ 26 نومبر سے 24 دسمبر تک پاکستان کے تمام تعلیمی اداروں میں گھر سے تعلیم کا سلسلہ شروع کیا جائے گا۔
ان کا کہنا تھا کہ ان میں یونیورسٹی، کالج، سکول، ٹیوشن سینٹرز اور دیگر ادارے شامل ہیں ۔ انہوں نے مزید کہا کہ 25 دسمبر سے 10 جنوری تک تمام تعلیمی اداروں میں سردیوں کی مکمل تعطیلات شروع ہو جائیں گی۔
این سی او سی پہلے بھی تعلیمی ادارے فوری بند کرنے کی سفارش کرچکی ہے، 16 نومبر کو بین الصوبائی وزرائے تعلیم نے 23 نومبر تک تعلیمی ادارے بند نہ کرنے کی استدعا کی تھی ۔
گزشتہ روز شفقت محمود نے کہا تھا کہ ملک میں کورونا وبا کے بڑھتے کیسز اور اموات میں تعداد میں مسلسل اضافے کے پیش نظر حکومت پیر کو تمام اکائیوں کے اجلاس میں 25 نومبر سے اسکول بند کر دینے کی تجویز پیش کرے گی۔
ان کا کہنا تھا کہ حکومت کی تجاویز میں کیمپس کے بجائے گھر پر تعلیم حاصل کرنے کا آپشن شامل ہو گا۔
شفقت محمود نے بتایا کہ وفاقی حکومت یہ تجویز پیش کرے گی کہ اساتذہ اسکول آئیں مگر بچے ان سے آن لائن تعلیم حاصل کریں، جہاں آن لائن کا سلسلہ ممکن نہ ہو وہاں بچے ایک دن کے لیے اسکول آ کر ہوم ورک لے جائیں۔
پاکستان میں کورونا کی دوسری لہر میں شدت مسلسل بڑھ رہی ہے، گزشتہ 24 گھنٹوں کے دوران 34 افراد اس وبا کے ہاتھوں انتقال کر گئے ہیں جبکہ 2756 افراد میں کورونا کی تشخیص ہوئی ہے۔
