ٹرمپ نے وائٹ ہاؤس خالی کرنے کو جو بائیڈن کی فتح کی تصدیق سے مشروط کر دیا، کہتے ہیں انتخابات میں جوبائیڈن کی فتح کی تصدیق ہو جائے تو وائٹ ہاؤس چھوڑ دوں گا۔
امریکی صدر ڈونلڈ ٹرمپ انختابی نتائج کے حوالے سے تاحال گو مگو کا شکار ہیں، ایک دن وہ اپنی شکست کو تسلیم کرتے ہیں تو اگلے دن اس سے انکار کر دیتے ہیں۔
لیکن اب دکھائی دے رہا ہے جیسے ڈونلڈ ٹرمپ نے اپنی شکست تسلیم کرنے کا راستہ ڈھونڈ نکالا ہے، انہوں نے کہا کہ الیکٹورل کالج کی جانب سے بائیڈن کی فتح کی تصدیق ہو جائے تو صدراتی محل چھوڑ دوں گا، ساتھ ہی انہوں نے کہا کہ اگر ایسا ہوا تو یہ بڑی غلطی ہو گی۔
ٹرمپ نے پھر یہ الزام دہرایا کہ الیکشن فراڈ تھا اور وہ قانونی کارروائی جاری رکھیں گے اور ہار ماننا آسان کام نہیں ہو گا۔
یاد رہے امریکی صدارتی انتخابات کو ایک ماہ کا عرصہ ہونے کو ہے لیکن انتخابی نتائج کو تسلیم کرنے کے حوالے سے ٹرمپ کی جانب سے نت نئے مؤقف سامنے آتے رہتے ہیں۔
جو بائیڈن کی تقریب حلف برداری میں شرکت کے حوالے سے پوچھے گئے سوال پر ڈونلڈ ٹرمپ نے جواب دینے سے گریز کرتے ہوئے کہا کہ انہیں اس کا جواب معلوم ہے۔
واضح رہے کہ 3 نومبر کو ہونے والے صدارتی انتخابات میں جوبائیڈن کو صدر ٹرمپ پر ناقابل شسکت سبقت حاصل ہے، جوبائیڈن کے الیکٹورل ووٹس کی تعداد 306 جب کہ ٹرمپ کے الیکٹورل ووٹس کی تعداد 232 ہے۔
خیال رہے تمام الیکٹرز اپنی اپنی ریاستوں میں 14 دسمبر کو جمع ہو کر صدر اور نائب صدر کا انتخاب کریں گے۔
