وزیراعظم عمران خان نے کہا ہے کہ میں آصف زرداری اور نوازشریف کو 40 سال سے جانتا ہوں، میں نے ان کے اوپر اللہ کا عذاب آتا ہوا دیکھا ہے۔
گلگت بلتستان کی کابینہ کی تقریب حلف برداری کے موقع پر خطاب کرتے ہوئے وزیراعظم عمران خان نے مسلم لیگ ن اور پی ڈی ایم کو شدید تنقید کا نشانہ بنایا۔
ان کا کہنا تھا کہ اس پیسے کا کیا فائدہ جو آپ اور آپ کی اولاد کو تباہ کر دے۔
انہوں نے کہا کہ یہ لوگ چوری کا پیسہ بچانے کیلے جیل، سعودی عرب اور لندن بھاگ جاتے ہیں پھر چوری کا پیسہ چھپانے کیلئے اولاد کو بھی جھوٹ بولنا پڑتا ہے۔
انہوں نے کہا کہ لوگ ایک جگہ جمع ہوں تو کورونا پھیلتا ہے لیکن یہ لوگ چوری بچانے کیلئے جلسے جلوس کررہے ہیں۔
ان کا کہنا تھا کہ ایک لیڈر کو صادق اور امین ہونا چاہیے، قائد اعظم کے دشمن بھی انہیں سچا آدمی مانتے تھے۔
وزیراعظم نے اپنے خطاب میں پالیسیوں کا ذکر کرتے ہوئے کہا کہ ماضی میں جو علاقے ترقی میں پیچھے رہ گئے ان کو اوپر اٹھائیں گے۔
انہوں نے کہا کہ بیماریوں کی جڑ پریشانی ہے، اسحاق ڈار کا انٹرویو دیکھیں تو پتہ چلتا ہے کہ پریشانی کیا ہوتی ہے۔
ان کا کہنا ہے کہ حرام کا پیسہ خود ایک عذاب ہے اور یہ لیڈر کرپشن بچانے کےلیے جلسے کرتے ہیں۔
انہوں نے کہا کہ انسانیت کی مدد کرنے سے اللہ تعالیٰ خوش ہوتا ہے، اللہ نے ہمیں اپنے رسول حضرت محمد ﷺ کی زندگی سے سبق سیکھنے کا حکم دیا ہے۔
