پنجاب کے وزیر برائے جیل خانہ جات فیاض الحسن چوہان نے پی ڈی ایم کو چیلنج کیا ہے کہ اگر اپوزیشن جماعتیں جلسے میں 50 ہزار لوگ لے آئیں تو وہ سیاست چھوڑ دیں گے۔
اپنے ایک بیان میں فیاض الحسن چوہان کا کہنا تھا کہ مکس اچار پارٹی جھوٹ بولتی ہے، یہ 10 ہزارلوگ بھی نہیں لا سکتے، فضل الرحمان کہتے ہیں کہ پورے ملک سے لوگ آ رہے ہیں اور کرسیاں صرف 10ہزار ہیں۔
انہوں نے کہا کہ 10،10 فٹ پر ایک کرسی لگائی جا رہی ہے۔
صوبائی وزیر کا کہنا تھا کہ نیکٹا تھریٹ الرٹ جاری ہو گیا ہے، ان کو شرم نہیں آتی، یہ لوگ عوام کی زندگیاں خطرے میں ڈال رہے ہیں، مینارپاکستان میں کسی قسم کا کوئی پانی نہیں چھوڑا گیا۔
فیاض چوہان نے مزید کہا پی ڈی ایم جلسے کے لیے حکومت نے کوئی رکاوٹ نہیں ڈالی، موجودہ صورت حال میں پی ڈی ایم کو سمجھداری کا مظاہرہ کرنا چاہئے تھا، اپنے ابو کی کرپشن بچانے کے لیے یہ سب اکھٹے ہوئے ہیں۔
