وفاقی دارالحکومت میں ایک ہوٹل کی عمارت میں ایک لڑکی گر کر ہلاک جبکہ دوسری زخمی ہو گئی۔
پولیس کے مطابق یہ واقعہ بحریہ ٹاؤن میں پیش آیا جہاں گجرات سے دو مرد اور دو خواتیں شام کے وقت ہوٹل آئے اور پانچویں منزل پر موجود ایک کمرہ مانگا جو انہیں دے دیا گیا۔
پولیس کے مطابق اگلی صبح ایک بجے کے بعد دونوں خواتین کمرے کی بالکونی سے نیچے آ گریں۔
سکیورٹی گارڈ نے انہیں نیچے گرا ہوا دیکھا تو ہوٹل اسٹاف کو اس کی اطلاع دی، جب وہ جائے وقوعہ پر پہنچے تو وہاں ایک خاتون دم توڑ چکی تھی جبکہ دوسری شدید زخمی تھی۔
پولیس کا کہنا تھا کہ واقعے کے تھوڑی دیر بعد ہی ان کے مرد ساتھیوں کو ہوٹل چھوڑنے کی کوشش کرنے کے دوران گرفتار کر لیا گیا ہے۔
جب انہیں رکنے کا کہا گیا تو انہوں نے مزاحمت دکھائی جس پر ایک گارڈ نے انہیں خبردار کیا، تاہم انہوں نے دوبارہ فرار ہونے کی کوشش کی جس پر گارڈ نے ایک مرد کے پاؤں پر فائر کیا اور پولیس کو آگاہ کیا۔
پولیس بعد ازاں جائے وقوعہ پر پہنچ گئی اور دونوں مردوں کو گرفتار کر لیا۔
بعد ازاں دونوں زخمیوں کو اسپتال منتقل کر دیا گیا جبکہ مردوں کو پولیس تھانہ بند کر کے مقدمہ درج کر لیا گیا۔
پولیس کا کہنا تھا کہ ابتدائی تفتیش میں یہ بات سامنے آئی ہے کہ دونوں خواتین آپس میں بہنیں تھیں، مزید یہ کہ مرنے والی بڑی بہن شادی شدہ تھی اور ان کا ایک بیٹا تھا۔
لوہی بھیر پولیس نے ہوٹل کے کمرے سے کچھ ممنوعہ سامان بھی برآمد کر لیا ہے۔
پولیس کا کہنا تھا کہ حالات سے لگتا ہے کہ کسی معاملے پر تلخ کلامی کے بعد خواتین کو ان کے ساتھیوں نے ہوٹل کی بالکونی سے نیچے پھینک دیا۔
