اسحاق ڈار کی سینیٹر شپ خطرے میں ، وجہ سامنے آگئی

اسلام آباد ( مانیٹرنگ ڈیسک ) سابق وزیر خزانہ اور مسلم لیگ ن کے رہنما اسحاق ڈار کی سینیٹر شپ خطرے میںپڑ گئی ، صدر پاکستان ڈاکٹر عارف علوی نے الیکشن تیسری ترمیم آرڈیننس 2021 پر دستخط کر دیے ۔ نجی ٹی وی سماء نیوز کے مطابق الیکشن تیسری ترمیم آرڈیننس2021 کے بعد متنخب ارکان کو اجلاس کی پہلی نشست کے 60روز میں حلف اٹھانا ہوگا ، وقت پر حلف نہ اٹھانے پر منتخب رکن کی نشست خودبخود خالی ہو جائے گی ۔ واضح رہے کہ اسحاق ڈار 12 مارچ 2018 کو سینیٹ کے 6 سال کیلئے رکن منتخب ہوئے تھے مگر بیرون ملک ہونے کے باعث انہوں نے تاحال اپنے عہدے کا حلف نہیں اٹھایا ۔اسحاق ڈار پنجاب سے ٹیکنوکریٹ کی نشست پر کامیاب قرارپائے تھے ۔اسحاق ڈار کے کاغذات نامزدگی تحریک انصاف نے چیلنج کیے تھے جس پر الیکشن ٹربیونل نے ان کے کاغذات مسترد کردیئے تھے لیکن عدالت نے الیکشن ٹربیونل کا فیصلہ معطل کرتے ہوئے کاغذات منظور کردیئے تھے ۔