حکومت کا اسسٹنٹ اور ڈپٹی کمشنرز کیلئے سینکڑوں لگژری گاڑیاں خریدنے کا فیصلہ

اسلام آباد (نیوز ڈیسک ) سندھ کی صوبائی حکومت نے صوبے میں وسیع پیمانے پر غربت اور بے روزگاری کے باوجود اپنے اسسٹنٹ کمشنرز کے لیے 1300 سی سی گاڑیوں خریدنے کا فیصلہ کیا ہے۔
پرو پاکستان کی رپورٹ کے مطابق سندھ حکومت نے رواں مالی سال کے فنڈز میں اپنے اسسٹنٹ کمشنرز کے لیے گاڑیوں کے بیڑے کی خریداری کا ارادہ رکھتی ہے۔
تفصیلات کے مطابق سندھ حکومت شہری علاقوں کے اسسٹنٹ کمشنرز کے لیے 1300 سی سی ٹویو ٹا یارس جبکہ دیہی علاقوں کے اسسٹنٹ کمشنرز کے لیے ٹویوٹا ہلکس 4×4 ڈبل کیبن اسٹینڈرڈ ایڈیشن کی خریدی جائے گی۔
واضح رہے کہ ایک ٹویوٹ یارس کی موجودہ قیمت تقریباً 49 لاکھ روپے جبکہ ٹویوٹا ہلکس 4×4 ڈبل کیبن اسٹینڈرڈ ایڈیشن کی قیمت ایک کروڑ روپے ہے۔
اس کے علاوہ صوبے کے 31 اضلاع اور 150 سب ڈویژنز کے ڈپٹی کمشنرز کو اس سے بھی مہنگی کاریں فراہم کی جائیں گی۔ ان گاڑیوں کی خریداری کے حوالے سے ایک سوال کے جواب میں صوبائی وزیر برائے ترقی و منصوبہ بندی سید ناصر حسین شاہ نے کہا کہ یہ ایک ضروری امر ہے۔
انہوں نے مزید کہا کہ ”رواں مالی سال کے بجٹ میں اس کے لیے پہلے ہی فنڈز مختص کیے جا چکے ہیں۔“ ناصر شاہ کا کہنا تھا کہ سرکاری ڈیوٹی کے لیے گاڑیوں کی ضرورت ہوتی ہے اور حکومت عیش و عشرت پر پیسہ ضائع نہیں کر رہی۔