اسٹیٹ بینک نے 4 سال بعد شرح سود میں کمی کا اعلان کردیا

کراچی(نیوز ڈیسک ) اسٹیٹ بینک آف پاکستان نے شرح سود میں کمی کا اعلا ن کردیا۔ اسٹیٹ بینک نے شرح سود میں 150 بیسس پوائنٹ کمی کی ہے۔
اسٹیٹ بینک نے 1.5 فیصد کمی کے بعد شرح سود 22 فیصد سے کم کر کے 20.5 فیصد کردی ہے۔ امریکی جریدے بلومبرگ کے مطابق حالیہ کمی ملک میں 4 برسوں کے دوران شرح سود میں ہونے والی پہلی کمی ہے۔ اسٹیٹ بینک کے مطابق شرح سود میں کمی کا فیصلہ آج ہونے والے مانیٹری پالیسی کمیٹی کے اجلاس میں کیا گیا۔ اجلاس میں نوٹ کیا گیا کہ توقعات کے مطابق فروری سے مہنگائی میں خاطر خواہ کمی آئی ہے اور مئی کے مہینے کا آؤٹ ٹرن توقعات سے زیادہ بہتر رہا۔
خیال رہے کہ ملک میں جون 2023 سے شرح سود 22 فیصد پر برقرار تھی۔