9مئی کو فوجی تنصیبات کے ٹارگٹ پہلے سے طے تھے ،جنرل فیض نے پی ٹی آئی کو استعمال کیا ،خواجہ آصف کے نئے انکشافات ، رافعہ زاہد کی رپورٹ 

اسلام آباد (رافعہ زاہد سے ) جنرل فیض نے پی ٹی آئی کے پریشان ذہن کو استعمال کیا۔۔راولپنڈی، مردان، لاہور، فیصل آباد، چکدرہ میں فوجی تنصیبات کے ٹارگٹ پہلے سے طے شدہ تھے۔9 مئی کو فوجی تنصیبات پر حملوں میں ان مقامات کی شناخت اور راہنمائی میں جنرل فیض کا بڑا کردار۔۔وزیر دفاع خواجہ آصف کا تہلکہ انگیر انکشاف
ہم نیوز کے پروگرام “فیصلہ آپ کا” میں وزیر دفاع خواجہ محمد آصف نے بڑا انکشافی بیان دیا کہ میں اس سیاسی نتیجے پر پہنچا ہوں کہ نو مئی کو فوجی تنصیبات پر جو حملے ہوئے ان مقامات کی شناخت اور نشاندہی میں جنرل فیض کا کردار تھا-
پروگرام میں مزید گفتگو کرتے ہوئے وزیر دفاع خواجہ محمد آصف کا کہنا تھا کہ جنرل فیض نے آرمی چیف تعیناتی کے وقت متعلقہ کوارٹرز کے ساتھ کوشش کی کہ انہیں آرمی چیف بنایا جائے، انہوں نے ماضی کے کردار کی وضاحتیں بھی دیں اور آنے والے وقت کی یقین دہانیاں بھی کرائیں، جنرل فیض طاقت کی انتہا تک چاہتے تھے۔ جب جنرل فیض کو چیف نہیں بنایا گیا تو انہوں نے پی ٹی آئی کے پریشان ذہن کو استعمال کیا۔ نو مئی میں فوجی ٹارگٹس کی نشاندہی کی۔
وزیر دفاع نے سانحہ نو مئی پر مزید گفتگو کرتے ہوئے کہا کہ جنرل فیض نے اپنے مقاصد کے لیے نو مئی کو پی ٹی آئی کا استعمال کیا۔ ان کا کہنا تھا کہ راولپنڈی، مردان، لاہور، فیصل آباد، چکدرہ میں فوجی تنصیبات کے ٹارگٹ پہلے سے طے کیے گئے تھے۔ پاکستان کی تاریخ میں ایسا نہیں ہوا، جب بھی ہوا عوام نے دفاتر اور گاڑیاں جلائیں۔برطانیہ میں راتوں رات عدالتیں لگا کر سزائیں دی گئیں یہ ہمارے ہاں شرم کا مقام ہے۔