اسلام آباد (نیوز ڈیسک) سینئر صحافی زاہد گشکوری کے مطابق غیرملکی تحائف کی نیلامی سے حاصل 22 کروڑ روپے کا دستاویزاتی ریکارڈ توشہ خانہ سے غائب ہونے کا انکشاف ہوا ہے۔
اسپیشل آڈٹ رپورٹ میں حکومت کو معاملے کی جلد انکوائری کروانے کی سفارش کی گئی، مختلف وزرائے اعظم کیلئے تحائف خریدتے وقت توشہ خانہ کے قوانین نرم کرنے کا بھی انکشاف ہوا ہے۔
رپورٹ میں انکشاف کیا گیا کہ تحائف کی قیمتوں کا جائزہ لینے والی کمپنیوں کے پاس اشیاء کی قیمت کا جائزہ لینے کا کوئی تجربہ نہیں تھا،کمپنی کو ہیروں، سونے، گھڑیوں، زیورات، دستکاری وغیرہ کے جائزے کا تجربہ دیکھے بغیر منتخب کیا گیا۔
رپورٹ میں سفارش کی گئی کہ حقائق جاننے کیلئے انکوائری کرائی جائے اور اختیارات کے بے قاعدہ اور غیر مجاز استعمال میں ملوث افراد کا پتہ لگایا جائے۔
رپورٹ کے مطابق سال 2017 میں 6کروڑ سے زائد اورسال 2018 میں 4 کروڑ 75لاکھ توشہ خانہ میں اکٹھے ہوئے، 2019 میں توشہ خانہ تحائف سے 10 کروڑ سے زائدکی رقم حاصل ہوئی۔ سال 2021 میں 40 لاکھ روپے توشہ خانہ تحائف سے اکٹھے کیے گئے، 2022ء میں توشہ خانہ تحائف کی قیمت کی مد میں 57 لاکھ روپے حاصل کیے گئے۔
رپورٹ کے مطابق یہ رقم تحائف کی اصل قیمت کا جائزہ لیکر 2002 سے 2023 تک سرکاری خزانہ کے لئے حاصل کی گئی تھی، وفاقی کابینہ کی منظوری کے باوجود 2002کے بعد کا ریکارڈ پبلک نہیں کیا جاسکا، تمام رسیدیں آڈٹ ٹیم کو پیش نہیں کی گئیں اورکئی سالوں کا ریکارڈ خفیہ بتا کر آڈٹ حکام کو دکھایا ہی نہیں گیا۔
غیرملکی تحائف کی نیلامی سے حاصل 22 کروڑ روپے کا دستاویزاتی ریکارڈ توشہ خانہ سے غائب ہونے کا انکشاف
