متعددوفاقی و صوبائی ادارے اربوں روپے کے نادہندہ ، لیسکو نے فہرست جاری کر دی

اسلام آباد (نیوز ڈیسک) لاہورالیکٹرک سپلائی کمپنی نے بجلی کے بلوں کی مد میں بھاری رقوم کے نادہندہ محکموں کی فہرست جاری کی ہے ۔
فہرست کے مطابق ٹی ایم ایز پانچ ارب روپے کی نادہندگی کیساتھ سرفہرست ہے،محکمہ پولیس کے ذمہ پچپن کروڑ، ڈسٹرکٹ گورنمنٹ لاہور کے ذمے پینتالیس کروڑ، ڈسٹرکٹ اینڈ تحصیل ہسپتال لاہورکے ذمہ تینتالیس کروڑ روپے واجب الادا ہیں۔
دوسری جانب لاہور ڈویلپمنٹ اتھارٹی تیئس کروڑ، پارکس اینڈ ہارٹی کلچر اتھارٹی بائیس کروڑ روپے، محکمہ جیل پنجاب اکیس کروڑ، لاہور رنگ روڈ اتھارٹی بیس کروڑ روپے، میو ہسپتال لاہور سترہ کروڑ روپے، وزارت ریلوے کے ذمہ چوالیس کروڑ ہیں۔
اسی طرح محکمہ پی ڈبلیو ڈی پاکستان کے ذمے نو کروڑ روپے، کیبنٹ سیکریٹریٹ کے ذمہ سات کروڑ روپے، جیولوجیکل سروے آف پاکستان کے ذمے پانچ کروڑ روپے جبکہ پاکستان ایڈمنسٹریٹو سٹاف کالج کے ذمہ تین کروڑ اور ایس ای بلڈنگز واپڈا ہاؤس کے ذمے تین کروڑ روپے واجب الادا ہیں۔