گجرات (انڈیا ) کے مشہور ریسٹورنٹ کے ٹوائلٹ میں خواتین کی خفیہ ویڈیو ز بنانے کا معاملہ ، ملازم گرفتار، کیمرہ کہاں لگا رکھا تھا ؟ 

سورت: پپلوڈ کے مشہور K’s Charcoal ریسٹورنٹ میں اتوار کی شام ایک خاتون گاہک نے ٹوائلٹ کے ایگزاسٹ فین میں ایک موبائل فون چھپا ہوا پایا اور اس میں اپنی ہی ایک ویڈیو ریکارڈ شدہ دیکھ لی۔

پولیس نے بعد میں ریسٹورنٹ کے جھاڑو دینے والے 30 سالہ ملازم، سریندر رانا کو گرفتار کر لیا اور اس کے قبضے سے دو موبائل فون برآمد کیے۔ تفتیش کاروں کو ان میں سے چار نازیبا ویڈیوز ملیں جو گاہکوں کی ریکارڈنگ پر مشتمل تھیں۔

تفصیلات کے مطابق اتوار کی شام جب خاتون گاہک فلش استعمال کرنے کے لیے مُڑی تو اُس نے ایگزاسٹ فین میں موبائل فون چھپا ہوا دیکھا۔ اُس نے فوراً اپنی دوست کو بلایا اور فون باہر نکالا۔ اس میں اپنی ہی ویڈیو دیکھ کر وہ شکایت لے کر اُمرا پولیس اسٹیشن پہنچ گئی۔

پولیس نے ریسٹورنٹ جا کر موبائل کے مالک رانا کو گرفتار کر لیا، جو وہاں تین سال سے ملازم تھا۔

پولیس کا کہنا تھا کہ ملزم سے دوسرا موبائل بھی برآمد کیا ہے۔ دونوں فونز چیک کرنے پر پولیس کو چار ویڈیوز ملی ہیں جو اسی طریقے سے بنائی گئی تھیں۔ پولیس نے ملزم کو موبائل فونز کو ٹیکنیکل جانچ کے لیے بھیج دیا ہے اور یہ پتہ لگا رہے ہیں کہ وہ کب سے یہ کر رہا تھا۔ اس بات کی بھی جانچ ہو رہی ہے کہ آیا اس نے یہ ویڈیوز کسی کو بھیجی یا بیچی تو نہیں۔

ریسٹورنٹ انتظامیہ نے اس واقعے پر معافی مانگتے ہوئے بیان جاری کیا: K’s Charcoal اس افسوسناک واقعے پر سخت حیران اور دکھی ہے۔ ہم اس فعل کی شدید مذمت کرتے ہیں جو ہمارے اعتماد اور اقدار کے منافی ہے۔ ہمارے اپنے اہلِ خانہ بھی انہی سہولیات کا استعمال کرتے ہیں۔ ہم نے فوری طور پر تمام عملے کی دوبارہ جامع اسکریننگ شروع کرنے کا فیصلہ کیا ہے۔ اپنے مہمانوں کو مزید اعتماد دلانے کے لیے، ہم نے یہ فیصلہ کیا ہے کہ ریسٹورنٹ کو عارضی طور پر بند رکھا جائے گا جب تک کہ تمام حفاظتی اقدامات مکمل نہ ہو جائیں۔