انتقال سے چند گھنٹے قبل دنیا بھر میں اپنے انصاف کیلئے مشہور جج فرینک کیپریو کا نم آنکھوں سے سوشل میڈیا پیغام وائرل 

اونچی کرسی پر بیٹھے ہوئے، آنکھوں پر چشمہ لگائے، اور ملزمان پر نگاہ رکھتے ہوئے، جج فرینک کیپریو نے عدالت میں وہ چیز لے کر آئے جس کی کسی نے توقع نہیں کی تھی ۔ نرمی اور ہمدردی۔ 88 سالہ جج جو جمعرات، 21 اگست کو انتقال کر گئے اپنی سمجھ بوجھ اور قانون توڑنے والوں کو دوسرا موقع دینے کے رویے کے باعث جانے جاتے تھے۔

امریکی جج، جو ریئلٹی شو Caught in Providence کے ذریعے دنیا بھر میں مشہور ہوئے، ہمیشہ یہ پوچھتے تھے کہ کوئی قانون کیوں توڑتا ہے، اور اس کے پس منظر اور سماجی و معاشی حالات کو بھی مدنظر رکھتے تھے۔

جمعرات کو ان کے خاندان نے تصدیق کی کہ وہ لبلبے کے کینسر کے ساتھ طویل جدوجہد کے بعد چل بسے۔ وفات سے ایک دن پہلے، کیپریو نے سوشل میڈیا پر مداحوں اور عوام سے اپنی صحت کے لیے دعا کی اپیل کی تھی۔

انہوں نے کہا:گزشتہ سال میں نے آپ سب سے دعا کی درخواست کی تھی اور یہ بالکل واضح ہے کہ آپ نے کی کیونکہ میں ایک بہت مشکل وقت سے گزر آیا۔ بدقسمتی سے مجھے ایک بار پھر دھچکا لگا ہے اور میں دوبارہ اسپتال میں ہوں۔ اس لیے میں آپ سب سے پھر درخواست کرتا ہوں کہ مجھے اپنی دعاؤں میں یاد رکھیں۔

کیپریو نے دسمبر 2023 میں اپنی بیماری کی تشخیص کا اعلان کیا تھا، جب انہیں اپنی سالگرہ کے دن یہ خبر ملی، جسے وہ اپنی زندگی کا "سب سے خوشی کا دن” قرار دیتے تھے۔

انہوں نے مزید کہا:اور اس لیے میں آپ سے دوبارہ درخواست کرتا ہوں، اگر یہ زیادہ نہ ہو، تو براہ کرم مجھے اپنی دعاؤں میں یاد رکھیں۔ میں دعا کی طاقت پر بہت یقین رکھتا ہوں۔ مجھے لگتا ہے کہ اوپر بیٹھا خدا ہم سب پر نظر رکھے ہوئے ہے۔ اس لیے براہ کرم مجھے یاد رکھیں۔

اس ویڈیو میں، جس میں کمزور فرینک آنکھوں میں آنسو لیے دکھائی دیتے ہیں، ان کی وفات سے محض 24 گھنٹے قبل پوسٹ کی گئی تھی۔ کیپشن میں لکھا تھا: "جیسے جیسے میں یہ مشکل جنگ لڑ رہا ہوں، آپ کی دعائیں میرا حوصلہ بڑھائیں گی۔

کچھ گھنٹے بعد، جج کیپریو کے خاندان نے ان کے مداحوں کا شکریہ ادا کیا:جج کیپریو آپ سب کی دعاؤں، محبت اور حمایت پر دل سے شکر گزار ہیں جبکہ وہ اسپتال میں زیر علاج ہیں۔ آپ کی مہربانی اور حوصلہ افزائی ان کے لیے دنیا کی حیثیت رکھتی ہے۔ وہ اور ان کا خاندان آپ سب کے انتہائی مشکور ہیں۔ براہ کرم آج بھی انہیں اپنی دعاؤں میں یاد رکھیں۔کچھ ہی دیر بعد، ان کی وفات کا باضابطہ اعلان کیا گیا۔

کیپریو کے بیٹے نے والد کی وفات کے بعد ایک اور ویڈیو شیئر کی، جس میں بتایا گیا کہ جج اپنے اہلِ خانہ اور دوستوں کے درمیان دنیا سے رخصت ہوئے۔

انہوں نے کہا:میں اپنی پوری فیملی کی طرف سے آپ سب کا شکریہ ادا کرتا ہوں کہ آپ نے ان کے لیے دعا کی اور اس مشکل سفر میں ان کا ساتھ دیا۔ آپ کی محبت نے انہیں اس طرح سہارا دیا جسے الفاظ بیان نہیں کر سکتے۔

انہیں بہترین ڈاکٹرز کی طبی سہولت حاصل تھی، لیکن اصل طاقت ان کی محبت اور حمایت تھی جو آپ سب نے انہیں دی۔ اسی محبت نے ان کی روح کو تقویت دی اور انہیں حوصلہ دیا کہ وہ اپنی تشخیص سے ڈیڑھ سال زیادہ جی سکیں۔ اس لیے ان کی یاد میں، براہ کرم آج کچھ نیکی کریں۔ مجھے یقین ہے وہ یہی چاہتے۔ ابو، ہم آپ سے محبت کرتے ہیں۔ خدا آپ کو سکون دے۔

کیپریو 1985 سے پروویڈنس میونسپل کورٹ کے جج کی حیثیت سے خدمات انجام دے رہے تھے۔ وہ اپنے ٹی وی شو Caught in Providence کے ذریعے شہرت کی بلندیوں پر پہنچے، جسے 2021 میں Daytime Emmy Award کے لیے نامزد کیا گیا تھا۔

عدالت میں ان کی شرافت، عاجزی اور ہمدردانہ رویے کی وجہ سے وہ مشہور تھے۔ وہ ٹریفک قوانین کی خلاف ورزی کرنے والوں کے ساتھ نرم دل رویے اور بچوں سے محبت بھرے رویے کی وجہ سے دنیا بھر کے لوگوں کے دل جیت گئے۔