ایک ویڈیو میں، جو مبینہ طور پر اس کی موت سے چند دن پہلے بنائی گئی تھی، اتھولیا سیکھر کو روتے اور میز کے گرد بھاگتے ہوئے دیکھا جا سکتا ہے، جبکہ اس کا شوہر ستیش شنکر اسے مار رہا ہے۔
اتھولیا اپنی 30ویں سالگرہ منانے کے ایک دن بعد شارجہ کے رولا علاقے میں اپنے فلیٹ میں مردہ پائی گئی۔ شارجہ حکام کی جاری کردہ فرانزک رپورٹ کے مطابق بھارتی خاتون نے خودکشی کی تھی۔ اس کے والدین نے ستیش کے خلاف جسمانی اور ذہنی تشدد کا مقدمہ درج کرایا ہے، اور نئے شواہد عدالت میں ان کے دعوے کی حمایت میں پیش کیے گئے ہیں۔
ملیالم اخبار منورما کے مطابق، ویڈیو میں ستیش (شوہر ) کو اپنی بیوی کو یہ کہتے سنا جا سکتا ہے کہ تمہیں چھری مار دوں گا اور جیل چلا جاؤں گا۔ تم میرے بغیر زندہ نہیں رہ سکو گی۔ میں تمہیں میرے بغیر زندہ نہیں رہنے دوں گا۔ کہاں جاؤ گی تم؟ میں تمہیں کبھی جانے نہیں دوں گا۔ اگر ضرورت پڑی تو میں کسی کو تمہیں مارنے کے لیے کرائے پر رکھوں گا۔ اس کے لیے میری ایک مہینے کی تنخواہ بھی کافی ہوگی۔
ستیش کی جانب سے اتھولیا پر جسمانی تشدد کی ویڈیوز سوشل میڈیا پر بڑے پیمانے پر وائرل ہو گئی ہیں۔ ملیالم میڈیا کو دیے گئے بیانات میں ستیش نے یہ اعتراف کیا کہ اس نے اتھولیا کو جسمانی طور پر نقصان پہنچایا، لیکن اس کا دعویٰ تھا کہ اس نے یہ سب محبت کی وجہ سے کیا۔
دوسری جانب، ستیش کے وکلا کا کہنا ہے کہ ویڈیو پرانا ہے اور اس بات کی تصدیق کے لیے کہ یہ کب بنایا گیا تھا، ڈیجیٹل فرانزک جانچ کی ضرورت ہے۔
اسی ماہ کے اوائل میں، ستیش کو اُس وقت گرفتار کیا گیا جب وہ کیرالہ کے دارالحکومت ترواننت پورم پہنچا۔ 40 سالہ ستیش کو ڈسٹرکٹ کورٹ سے عبوری ضمانت ملی تھی اور بیان ریکارڈ کرانے کے بعد اسے ضمانت پر رہا کر دیا گیا۔
