سات سال جس کے قتل کا الزام برداشت کیا اس شوہر کو بیو ی نے سات سال بعد کیسے کھوج نکالا ؟ ناقابل یقین خبر

لکھنؤ: بھول جائیں سی آئی ڈی، بھول جائیں پرائیویٹ جاسوس۔ اتر پردیش کے ہردوئی میں ایک بیوی نے کیسے سات سال سے لاپتہ شوہر کو ڈھونڈ نکالا؟دلچسپ تفصیلات سامنے آگئیں ۔

اپریل 2017 میں مرارن نگر، سندیلا کی شیلو نے جیتندر کمار سے شادی کی تھی، جسے گاؤں میں ببلو کے نام سے جانا جاتا تھا۔ شادی کے چند ماہ بعد ہی شیلو ماں بننے والی تھی۔ لیکن باپ بننے کے بجائے ببلو غائب ہو گیا

اس کے گھر والوں نے شیلو کی مدد کرنے کے بجائے اسی پر شوہر کے قتل اور لاش چھپانے کا الزام لگا دیا۔ سندیلا تھانے میں گمشدگی کی رپورٹ درج ہوئی مگر کیس جلد ہی سرد خانے میں چلا گیا۔ برسوں تک شیلو پر "شوہر کے قاتل” ہونے کا داغ لگا رہا اور وہ اپنے بیٹے کو اکیلے پالتی رہی۔

2025 میں اچانک سب کچھ بدل گیا۔ انسٹاگرام ریلز دیکھتے ہوئے شیلو نے ایک آدمی کو لدھیانہ میں ناچتے ہوئے دیکھا۔ مسئلہ یہ تھا کہ وہ کوئی اجنبی نہیں بلکہ خود ببلو تھا، زندہ اور موج مستی کرتا ہوا، وہ ایک نئی عورت کے ساتھ دکھائی دے رہا تھا، جو بعد میں پولیس کے مطابق اس کی دوسری بیوی نکلی۔

غصے سے بھری شیلو نے وہ رییل وائرل کر دی اور پھر باضابطہ شکایت درج کرائی۔ فوری کارروائی کرتے ہوئے سرکل آفیسر سنتوش کمار سنگھ اور ان کی ٹیم سب انسپکٹر رنجنی کانت پانڈے، ہیڈ کانسٹیبل دیوکر مشرا، اور کانسٹیبل سنیل کمار نے ببلو کو لدھیانہ سے ٹریس کر کے گرفتار کر لیا، جہاں وہ ایک کپڑوں کی فیکٹری میں کام کر رہا تھا اور دوہری زندگی گزار رہا تھا۔ اس پر بھارتیہ نیاے سنہتا کی دفعہ 82(1) (دوہری شادی/بگیمی) کے تحت مقدمہ درج کیا گیا۔

پولیس کے مطابق شیلو اور ببلو کی شادی 2017 میں ہوئی اور 2018 میں ان کے بیٹے کی پیدائش ہوئی۔ بچے کی پیدائش کے چند ہی ہفتوں بعد ببلو لاپتہ ہو گیا۔ اس کے گھر والوں نے لاعلمی کا اظہار کیا لیکن چپکے سے شیلو کے خلاف شکایت درج کرا دی۔

“وقت گزرتا گیا، مگر وہ کبھی واپس نہیں آیا،” شیلو نے صحافیوں کو بتایا۔ اس نے کہا کہ حمل کے دوران تنہا چھوڑ دیے جانے کا صدمہ اسے ہمیشہ ستاتا رہا۔ اس نے یہ بھی الزام لگایا کہ غائب ہونے سے پہلے ببلو بدسلوکی کرنے لگا تھا اور 2017 کے آخر میں اسے والدین کے گھر واپس آنے پر مجبور کیا۔ چار ماہ کے حمل میں اسے پتا چلا کہ ببلو غائب ہے۔

شیلو نے بتایا کہ جب اس نے اپنے گمشدہ شوہر کو آن لائن دیکھا تو وہ حیران رہ گئی۔ اس نے اپنے سسرال والوں سے سامنا کیا تو وہ بھی مان گئے کہ ویڈیو میں دکھائی دینے والا آدمی ببلو ہی ہے، مگر کوئی وضاحت نہ دی۔ جلد ہی پورے علاقے میں رییل پھیل گئی اور سب کو پتا چل گیا کہ “مرا ہوا” سمجھا جانے والا آدمی زندہ اور خوش ہے۔

پولیس تفتیش میں ثابت ہو گیا کہ ویڈیو اصلی ہے اور ببلو لدھیانہ میں نئی زندگی گزار رہا ہے۔ سرکل آفیسر سنتوش سنگھ نے بتایا، “انکوائری میں پتا چلا کہ جیتندر نے لدھیانہ میں دوسری شادی کر لی تھی۔ اسے حراست میں لے لیا گیا ہے۔”

شیلو کے لیے یہ انکشاف کڑوا سچ تھا۔ اس نے کہا: “مجھے نہیں معلوم اس نے مجھے حمل کے دوران کیوں چھوڑا، جب مجھے اس کی سب سے زیادہ ضرورت تھی۔” اس نے کہا کہ اس کے انتظار کے سال کسی سکون پر نہیں بلکہ ایک وائرل دھوکے پر ختم ہوئے۔