روس کے صدر ولادیمیر پیوٹن نے بھارت کے دورے کی تصدیق کر دی ہے، چند دن قبل یہ خبریں سامنے آئی تھیں کہ وہ رواں سال دسمبر میں دورہ کریں گے۔ اب میڈیا سے گفتگو کے دوران پیوٹن نے کہا کہ وہ اس دورے اور اپنے عزیز دوست” وزیر اعظم نریندر مودی سے ملاقات کے منتظر ہیں۔ وہ رواں سال دسمبر کےآغاز میں بھارت کا دورہ کریں گے ۔
اس سے قبل یہ رپورٹ ہوا تھا کہ پیوٹن سال کے اختتام تک وزیر اعظم مودی کے ساتھ سالانہ سربراہی اجلاس کے لیے بھارت کا دورہ کریں گے۔ ان کا دورہ اسٹریٹجک اور اقتصادی تعاون کو مضبوط بنانے کے مقصد سے ہوگا، خاص طور پر اس پس منظر میں جب امریکی صدر ڈونلڈ ٹرمپ نے بھارت پر 50 فیصد درآمدی ڈیوٹی عائد کی ہے۔
میڈیا سے گفتگو میں پیوٹن نے بھارت اور روس کے تعلقات پر بھی روشنی ڈالی، جو سوویت دور سے جاری ہیں، اور کہا کہ دونوں ممالک نے ہمیشہ خوشگوار تعلقات قائم رکھے ہیں۔
انہوں نے بھارت پر ٹرمپ کے روس سے تیل کے سودے پر دباؤ کا ذکر کیا اور بھارت کی تعریف کی کہ اس نے امریکہ کے دباؤ میں آ کر ہتھیار نہیں ڈالے۔ پیوٹن نے اعتماد کا اظہار کیا کہ نئی دہلی ماسکو پر اپنی توانائی کی انحصار کو ختم نہیں کرے گا۔پیوٹن نے وضاحت کی کہ اگر بھارت نے روس سے توانائی کا لین دین بند بھی کیا تو بھی اسے بھاری نقصان اٹھانا پڑے گا۔
انہوں نے کہا بھارت ہماری توانائی کے وسائل سے دستبردار ہوگا؟ اگر ایسا ہوا تو اسے بڑے نقصانات ہوں گے۔ کچھ اندازے کہتے ہیں کہ یہ نقصان تقریباً 9 تا 10 ارب ڈالر تک ہوسکتا ہے۔ لیکن اگر انکار نہیں کرتا تو اس پر پابندیاں لگیں گی اور نقصان اتنا ہی ہوگا۔ تو پھر انکار کیوں کرے جبکہ اس کے ساتھ اندرونی سیاسی نقصان بھی ہوگا؟ بھارتی عوا م کبھی خود کو کسی کے ہاتھوں ذلیل ہونے نہیں دیں گے۔ میں وزیر اعظم نریندر مودی کو جانتا ہوں، وہ بھی ایسا کوئی فیصلہ نہیں کریں گے۔
پیوٹن نے یہ بھی کہا کہ وہ بھارت کے ساتھ تجارتی عدم توازن کو درست کرنے کے لیے کام کریں گے اور بھارت سے زیادہ زرعی مصنوعات اور دوائیاں خریدنے کا منصوبہ رکھتے ہیں۔ مزید برآں ٹرمپ کے ٹیرف پر بات کرتے ہوئے پیوٹن نے کہا:”امریکی جرمانہ نما ٹیرف سے بھارت کو ہونے والے نقصانات روس سے خام تیل کی درآمدات سے پورے ہو جائیں گے، اور بھارت کو ایک خودمختار ملک کی حیثیت سے وقار بھی حاصل ہوگا۔
