برطانوی عوام کا امریکا پر اعتماد، ٹرمپ کے دوبارہ اقتدار میں آنے کے پہلے ہی سال میں بُری طرح گر گیا

ایک نئی بڑی سروے رپورٹ کے مطابق، ڈونلڈ ٹرمپ کے دوبارہ اقتدار میں آنے کے پہلے سال کے دوران برطانوی عوام کا امریکا پر اعتماد نمایاں طور پر کم ہو گیا ہے۔

YouGov کی جانب سے 4ہزار افراد پر مشتمل یہ سروے، ادارہ Best for Britain کے لیے کیا گیا، جس میں یہ بات سامنے آئی کہ برطانیہ کی 56 فیصد عوام اب امریکا پر اعتماد نہیں کرتی، جبکہ ایک سال پہلے یہ شرح 40 فیصد تھی۔

اسی دوران، امریکا پر اعتماد کرنے والوں کی شرح میں بھی نمایاں کمی آئی ہے — پچھلے 12 مہینوں میں یہ تعداد 30 فیصد سے گھٹ کر صرف 15 فیصد رہ گئی ہے۔

یہ نتائج ٹرمپ کی گزشتہ سال نومبر میں کمالا ہیرس کو شکست دے کر وائٹ ہاؤس میں واپسی کے ایک سال مکمل ہونے پر سامنے آئے۔

اس دوران ٹرمپ نے یوکرین جنگ جیسے معاملات اور برطانیہ سمیت دیگر ممالک پر بھاری ٹیکس (ٹیرف) لگانے جیسے فیصلوں پر برطانوی حکومت سے اختلافات بھی کیے ہیں۔

سروے کے مطابق اب برطانوی عوام یورپی یونین کو امریکا کے مقابلے میں زیادہ قابلِ بھروسا عالمی شراکت دار سمجھتی ہے۔

Best for Britain کی سربراہ ناؤمی اسمتھ کا ردِعمل

ان کا کہنا تھا کہ برطانوی عوام اب بخوبی سمجھتی ہے کہ ڈونلڈ ٹرمپ کا آمرانہ اور بے ترتیب طرزِ حکومت عالمی نظام کے لیے خطرہ ہے اور اسی لیے وہ ایک غیر مستحکم ہوتی ہوئی امریکا پر اب مکمل بھروسہ نہیں کرتی۔

“عوام بار بار کہہ چکی ہے کہ حکومت کو چاہیے کہ وہ ہمارے سب سے قابلِ اعتماد اور اہم تجارتی شراکت دار — یورپ — کے ساتھ عملی انداز میں کام کرے، تاکہ معیشت بہتر ہو، اخراجات کم ہوں اور مشترکہ سلامتی یقینی بن سکے۔

“اگر لیبر پارٹی نے بروقت یورپی یونین کے ساتھ کام تیز نہ کیا تو اگلے انتخابات میں عوامی رد عمل کا سامنا کرنا پڑ سکتا ہے۔”