بنگلورو میں ایک مستری اور اس کی بیوی نے مالی مشکلات کے باعث اپنی 65 سالہ مکان مالکن کو گلا گھونٹ کر قتل کر دیا اور اس کا 30 گرام سونے کا منگل سوتر (گلے کا ہندو شادی کا ہار) چُرا لیا۔
یہ جوڑا چھ ماہ پہلے گراؤنڈ فلور پر کرائے پر رہنے آیا تھا۔ پولیس نے صرف ایک دن میں انہیں گرفتار کر لیا۔ ان کے مشکوک رویے اور گھر سے غائب تکیے نے تفتیش میں اہم کردار ادا کیا۔
پولیس کے مطابق یہ واقعہ منگل کے روز جنوبی بنگلورو کے اُترا ہلی میں پیش آیا۔ ملزمان کی شناخت 26 سالہ پرساد سری سائیلا مکّئی اور اس کی 23 سالہ بیوی ساکشی کے طور پر ہوئی، جو ایک جیولری شاپ میں ملازمہ ہے۔ ان کی شادی کو ڈیڑھ سال ہوا تھا۔
واردات کیسے ہوئی؟
مرنے والی خاتون، شری لکشمی، فون پر اپنی بہن سے بات کر رہی تھیں جب یہ جوڑا ٹی وی خریدنے کا بہانہ بنا کر ان کے گھر میں داخل ہوا۔ چونکہ فون کال طویل تھی، دونوں کچھ دیر تک ٹی وی دیکھتے رہے۔ کال ختم ہونے کے بعد انہوں نے خاتون پر حملہ کیا، گلا گھونٹا اور ان کا سونے کا منگل سوتر لے کر فرار ہو گئے۔
پولیس کا کہنا ہے کہ خاتون کی چیخیں دبانے کے لیے انہوں نے چھوٹے تکیے کا استعمال کیا۔دلچسپ بات یہ کہ انہوں نے خاتون کی انگلیوں کی انگوٹھی، بالیوں اور ناک کی کیل کو نہیں چھوا۔
شک کیسے ہوا؟
خاتون کے شوہر اشوتھ نارائن (70)، جو اگربتی کی فیکٹری میں کام کرتے ہیں، دوپہر سوا دو بجے سے متعدد بار فون کرتے رہے مگر جواب نہ ملا۔ شام ساڑھے چھ بجے جب انہیں اطلاع ملی کہ ان کی بیوی فرش پر بےجان حالت میں ملی ہیں، تو وہ گھر پہنچے۔ انہوں نے بیوی کی گردن، ہونٹ اور چہرے پر زخم دیکھے اور ساتھ ہی گلے کا منگل سوتر غائب تھا۔ انہیں فوراً اپنے کرایہ دار جوڑے پر شک ہوا۔
اشوتھ کی شکایت پر سبرا منیا پورہ پولیس نے قتل، ڈکیتی اور جان سے مارنے کی نیت سے حملے کا مقدمہ درج کیا۔ لاش کو رات میں پوسٹ مارٹم کے لیے بھیج دیا گیا۔
پولیس نے منگل کو ہی جوڑے کو حراست میں لے لیا اور بدھ کے روز تفتیش کے دوران انہوں نے جرم کا اعتراف کر لیا۔ چوری کیا گیا سونے کا ہار بھی برآمد کر لیا گیا۔
